افغانستان کې د اسلامي امارت بیاځلي واکمني پنځم کال ته ننوځي، خو د افغانستان هوایي حریم لاهم د امریکا او ځينو ګاونډیو هېوادونو له خوا نقض کېږي.
د اسلامي امارت ویاند ذبیح الله مجاهد وایي، د افغانستان فضايي حریم لا هم د امریکا او ګاونډ هېوادونو له خوا وخت ناوخت نقض کېږي.
هغه له شمشاد سره ځانګړې مرکه کې ومنله چې د افغانستان فضا ته د امریکا الوتکې د ځینو ګاونډیو هېواونو له خاورې راننوځي او دا عمل د نړیوالو قوانینو خلاف دی.
د اسلامي امارت ویاند ذبیح الله مجاهد وايي: «هو، لاهم د افغانستان هوايي حریم د امریکایانو له خوا نقض کېږي او دلته یې الوتکې ګرځي. په دې وروستیو کې زموږ حریم څو ځلې د پاکستان له خوا هم نقض شوی. موږ په دې اړه جدي اعتراض کړی او غواړو چې د نقض دا لړۍ ودرېږي. موږ دا خبره بار بار له دوی سره شریکه کړې، خو دوی انکار کوي چې دا الوتکې د دوی دي مګر موږ کره معلومات لرو چې د دوی کشفي الوتکې د افغانستان فضا ته داخلېږي او دا د اعتراض وړ ده.»
مجاهد د کوم هېواد له نوم اخستو پرته ټینګار کوي چې ځينو ګاونډیو هېوادونو په تېرو شلو کلونو کې هم خپلې پوځي اډې د امریکا په واک کې ورکړې وې او له هغه ځایه د افغانستان خاوره بمبارېده.
نوموړي له ګاونډ هېوادونو وغوښتل چې خپلې هوایي پوځي اډې د افغانستان په ضد ونه کاروي.
مجاهد په دې اړه وايي: « ټول پوهېږي چې افغانستان په تېرو شلو کالو کې د چا له خاورې بمبار شو. دوی له امریکایانو سره زمینه سازي او همکاري لري؛ په هر حال، موږ غواړو چې امریکایان باید دا کار ونه کړي او زموږ د حریم نقض ودروي. هر هېواد چې اجازه ورکوي امریکا زموږ هوايي حریم نقض کړي، دا سم کار نه کوي، دا له تجاوز او نقض سره مرسته ده او باید ونه شي.»
دا خبره داسې مهال مطرح کېږي چې په دې وروستیو کې د هېواد په بېلابېلوولایتونو کې د امریکا بې پیلوټه الوتکو د ګرځېدو راګرځېدو راپورونه ورکړل شوي.
د پوځي چارو کارپوهان بیا له امریکا او د افغانستان له ګاونډ هېوادونوغواړي چې د کابل پر وړاندې خپلې پوځي پالیسۍ بدلې کړي.
پوځي کارپوه توریالی ځاځی وايي: « اسلامي امارت باید په دې اړه ملګرو ملتونو او نړیوالو هېوادونو ته شکایت وکړي.»
ذبیح الله مجاهد په دې مرکه کې وړاندې وایي، اسلامي امارت د چین، ترکیې او سعودي عربستان په مذاکراتو کې له پاکستاني لوري غوښتي و چې د پاکستان خاوره او فضا باید د افغانستان پر ضد ونه کاروله شي.
نوموړي په خپلو خبرو کې زیاته کړه، پاکستان کې یوه ځانکړې کړۍ چې د نړیوالو قدرتونو له لوري یې ملاتړ کیږي، د کابل او اسلام اباد اړیکې خرابوي.
