پلازمېنه کابل کې د کرنې او مالدارۍ نړیوال نندارتون سه شنبه د کرنې او مالدارۍ وزارت په نوښت پيل شو او د اګست میاشتې تر ۱۷مې نېټې به ادامه ولري.
د کرنې په برخه کې د دې نړیوال نندارتون مسوولان وايي، په نندارتون کې یې سلګونه غرفې د افغاني کرنیزو محصولاتو لپاره اېښې او د نورو کرنیزو او مالدارۍ محصولاتو ترڅنګ، د ملي پراختیا شرکت جوړ، شاوخوا ۷۰ ډوله کرنیز ماشینونه هم نندارې ته وړاندې شوي.
د ملي پراختیا شرکت ویاند نبيالله ارغندیوال وايي: « د نندارتون یوه برخه کرنې ته ځانګړې شوې. ملي پراختیا شرکت په خپلو تولیدي فابریکو کې ۷۰ ډوله کرنیز ماشینونه تولید کړي او عملا يې بازار ته وړاندې کړي. موږ په دې برخه کې د هېوادوالو رضایت هم ترلاسه کړی؛ ځکه دا ماشینونه هم ښه کیفیت لري او هم یې قېمت د بهرنیو ماشینونو په پرتله ټیټ دی.»
د کرنې او مالدارۍ نندارتون مسوول مجتبی وايي: « سلګونه غرفې فعالیت لري چې په کې انټرنېشنل غرفې هم شته او د هندوستان، ترکیې او ایران له هېوادونو پانګوالو په کې خپل محصولات نندارې ته اېښي.»
بهرني پانګوال هم په افغانستان کې د کرنیزو محصولاتو د پېر او پلور لپاره دا ډول نندارتونه ډېر مهم ګڼي او وايي، دا ډول نوښتونه کولی شي اقتصادي پرمختګونه رامنځته کړي.
یو تن ایراني پانګوال فرید وايي: « موږ هڅه خپل نوي محصولات نندارې ته وړاندې کړو، ترڅو موږ افغان کروندګر او مالداران ورسره وپېژني، ترڅنګ یې د دې هڅه هم کوو چې دا ټکنالوژۍ او تجربې افغانستان ته انتقال کړو؛ ځکه چې د ګاونډي افغانستان وده کولی شي د ایران پر ودې هم مخامخ اغېز ولري.»
یو بل بهرنی پانګوال نوید عظیمي وايي: « نن د نندارتون دویمه ورځ ده او موږ دلته ډېرې ښې تجربې ترلاسه کړې. زه هیله لرم دا نندارتون د همکاریو نوې دروازه جوړه شي، ترڅو وکولی شو راتلونکي کې نورې همکارۍ هم ولرو.»
بله خوا، هغه هېوادوال چې د دې نندارتون لیدنې ته راغلي، خوښي څرګندوي او زیاتوي چې دا ډول نندارتونونه د افغان کروندګرو او سوداګرو د ملاتړ لپاره حیاتي ارزښت لري.
د نندارتون ګډونوال زاهدالله وايي: « له حکومت غوښتنه کوو چې د همدې نندارتون په څېر په نورو برخو کې هم نندارتونونه جوړ کړي، ترڅو د افغانستان خلک له خپلو محصولاتو خبر شي. موږ د حکومت له دې اقدام ډېر خوښ یو.»
د نندارتون ګډونوال ریاضالله وايي: « دا لومړی ځل دی چې زه د افغانستان یوه داخلي نندارتون ته راغلی یم او له زړه ورته خوښ یم. زه په چین، مالېزیا او نورو هېوادونو کې هم نندارتونو ته تللی، خو کله چې د خپل هېواد نندارتون ګوم، خوښ یم چې ډېر په لوړ لېول کې دی. زه له خلکو غوښتنه کوم چې که څه ته اړتیا هم نه لري، نندارتون دې وګوري.»
دا په داسې حال کې ده چې د ایران د کرنې وزیر، غلام رضا نوري، کابل ته راغلی او د خپل سفر موخه یې په همدې نندارتون کې ګډون بللی.
