د مخکېني حکومت د مشرانو جرګې غړي او قومي مشر لایق منګل له شمشاد نیوز سره په ځانګړو خبرو کې له اسلامي امارت وغوښتل،چې له شپږم ټولګي پورته دې نجونو ته د زده کړو اجازه ورکړي.
منګل وایي، د اسلامي امارت مشران دې په عمل کې وښایي،چې د نجونو له زده کړو سره مخالفت نه لري.
منګل زیاته کړه:« هغه اسلامي لباس چې نجونې په افغانستان کې لري،ما نورو اسلامي هېوادونو کې نه دی لیدلی. زما هېله د اسلامي امارت له مشرانو دا ده، لکه څرنګه چې دوی وایي ، په عمل کې وښایي چې د نجونو له زده کړو سره مخالفت نه لري.»
منګل وایي،د اسلامي امارت له بیا واکمنیدو وروسته شااوخوا ۱۰ میاشتې تیریږي او په کار ده ،چې نور د نجونو د ثانوي زده کړو طرحه بشپړه شوي وي او نور له شپږم ټولګي پورته ښوونځیو ته د تګ اجازه ولري.
منګل زیاتوي:« اسلامي امارت باید دې ته حل لاره پیدا کړي،څومره ژر چې کیدی شي،خپله د اسلامي امارت له منځه د دې مخالفت نشته دی، چې ښوونځي نه پرانیزو،خو دا چې کوم شرایط ښایي هغه باید اوس برابر شوي وي،ځکه لس میاشتې پوره شوې.»
پخوانی سناتور لایق منګل د اسلامي امارت له مشرانو غواړي،چې پر کوردننه دې له سیاسیونو، د مدني ټولنو له استازو او په ټولییز ډول د مخکیني حکومت له کارکوونکو سره په اړیکه کې شي او په ځېنو برخو کې دې ترې مشورې واخلي.
هغه زیاتوي:« قوماندانان دي،والیان دي ، سناتوران دي ، وکیلان دي ، روڼ اندي دي او د مدني ټولنو استازي دي،باید له دوی سره وخت پر وخت پر کورد ننه په اړیکه شي او ناستې ورسره وکړي.»
پخوانی سناتور او قومي مشر لایق منګل پکتیا کې ژوند کوي او وایي،د ولس د خیر ښیګڼې لپاره پر هڅو بوخت دی او د اړتیا پر مهال جرګو او مرکو ته ځي.
