د بریټانیا حکومت باید نور د هغو افغانانو د خوندي کولو په برخه کې ځنډ ونه کړي چې په افغانستان کې یې د بریټانیوي ځواکونو ترڅنګ دنده ترسره کړې.
د بریټانیا دفاع وزارت په یوه داخلي ارزونه کې منلې چې له بریټانوي ځواکونو سره د همکارۍ سابقه لرونکي افغانان لا هم له ګواښ سره مخامخ دي.
د بریټانیا دفاع وزیر لوک پولارډ د روان کال په اپرېل کې اعلان کړی چې د انتقال لپاره وړ افغانې کورنۍ باید له افغانستان څخه خپله یوه بل درېیم هېواد ته لاړې شي.
د اېنډپېنډېنټ ورځپاڼې د راپور یوه برخه کې راغلي: « هغه زرګونه افغانان چې لا هم د انتقال په تمه دي، باید د امکان په صورت کې په خپله یوه درېیم هېواد ته ځانونه ورسوي. د بریټانیا د دفاع وزارت د روان کال په فبرورۍ کې په ترسره شوې ارزونه کې ویلي چې د دغو کسانو پر وړاندې خطر لا هم شته، که څه هم د خطر کچه کمه شوې ده.»
د راپور له مخې، زرګونه افغانان بریټانیا ته انتقال شوي، خو شاوخوا ۷ زره نور کسان لا هم په افغانستان او یا ګاونډیو هېوادونو او په ځانګړي ډول پاکستان او ایران کې پاتې دي.
د بریټانیا دفاع وزارت دا هم مني چې یاد کسان له خطر سره مخ دي او د بیا مېشتېدو شرایط لري.
د اېنډپېنډېنټ ورځپاڼې په راپور کې دغه راز راغلي، د دغو کسانو شمېر په ۲۰۲۲ کال کې د بریټانیا د دفاع وزارت له یوې سترې امنیتي معلوماتي رسوایۍ وروسته لا زیات شو؛ هغه مهال د هغو افغانانو نوملړ چې له بریټانیوي ځواکونو سره یې کار کړی و، په تېروتنه د ناخوندي برېښنالیک له لارې خپور شو.
د ورځپاڼې په باور، د بریټانیا حکومت باید د دې تېروتنې مسوولیت ومني او د اغېزمنو کسانو د خوندي کولو لپاره جدي او چټک ګامونه پورته کړي.
د ورځپاڼې راپور کې زیاته شوې: « د افغانانو د انتقال په برخه کې ځنډ او خنډونه د منلو وړ نه دي، ځکه موضوع یوازې د کډوالۍ او مهاجرت مسئله نه ده بلکې د هغو کسانو د خوندیتوب او د بریټانیا د ژمنو د پوره کولو مسئله ده چې د دې هېواد له ځواکونو سره یې د ژباړونکو، لارښودونکو، اداري کارکوونکو او نورو برخو کې مرسته کړې.»
د ورځپاڼې په باور، اوس د کابل له سقوط پنځه کاله وروسته، د بریټانیا حکومت باید نور ځنډ او بهانې پای ته ورسوي او د هغو افغانانو د امنیت لپاره اقدام وکړي چې له وړاندې د خوندیتوب لپاره منل شوي دي.
