نورستان کې د تېرو درنو سېلابونو او مرګ ژوبلې وروسته، یو ځل بیا په دې او ګاونډ کونړ ولایتونو کې تازه سېلابونو، یو شمېرکسانو ته د مرګ ژوبلې اړولو ترڅنګ، مالي زیانونه هم اړولي دي.
له پېښو سره د مبارزې چمتووالی اداره وایي، په تېرو ۲۴ ساعتونو کې په کونړ او نورستان ولایتونو کې د سېلابونو د راوتلو له امله، دوه تنه شهیدان او دوه نور تری تم دي.
د یادې ادارې د لومړنیو معلوماتو له مخې، دغو سېلابونو لسګونه کورونه، سړکونه، د اوبو شبکې، پلونه او کرنیزې ځمکې ویجاړې کړې دي.
له پېښو سره د مبارزې چمتووالي ادارې مرستیال ویاند، تاج محمد همت وايي: « له پېښو سره د مبارزې امادګۍ ادارې د ولایتي ریاستونو د لومړنیو معلوماتو له مخې، په تېرو ۲۴ ساعتونو کې له بده مرغه په کونړ او نورستان ولایتونو کې د سېلابونو راوتلو له امله دوه تنه شهیدان او دوه نور لادرک شوي دي. همدارنګه، ۸۰ بابه کورونه په بشپړ ډول او ۷ نور نیمه تخریب شوي، پنځه هټۍ په بشپړ ډول ویجاړې شوې، ۶ د اوبو څاه ګانې، یو کیلومټر سړک او د برق شبکه، درې پلونه او پلچکونه هم ویجاړ شوي دي. د دې ترڅنګ، د پنځو جرېبو ځمکو کرنیز حاصلات هم له منځه تللي. په ټولیز ډول ۸۹ کورنۍ زیانمنې شوې دي.»
د دې ادارې مرستیال ویاند غه راز وايي، د مسوولینو له لوري، ولایتي ریاستونو ته سپارښتنه شوې چې د پېښو سیمو ته رسېدنه وکړي او زیانمنو شویو کورنیو ته مرستې ورسوي.
