د خیبرپښتونخوا وزیر اعلی په خپلو تازه څرګندونو کې اعتراف کړی چې د خیبرپښتونخوا او بلوچستان وضیعت د دوی له کنټرول وتلی.
سهیل افریدي زیاته کړې، د پاکستان پوځ په خیبرپښتونخوا او بلوچستان کې د خپلو ګټو او ډالرو ګټلو لپاره په لوی لاس ناامني جوړه کړې او له خلکو قرباني اخلي.
افریدي دغه راز ویلي، له هغه وروسته چې په پاکستان کې د عمران خان حکومت ړنګ شو، پوځي جنرالانو د خیبرپښتونخوا او بلوچستان ناامنه کولو لپاره نوې پالیسي جوړه کړه او اوس یې پایله دا ده چې د دواړو صوبو وضیعت یې له کنټروله وتلی.
د خیبرپښتونخوا وزیر اعلی زیاته کړې: « اوس ټوله نړۍ پوهیږي چې د خیبر پښتونخوا وضیعت د دوی له کنټروله وتلی. لومړی دوی په لوی لاس د خیبر پښتخوا او بلوچستان حالات خراب کړل او اوس د دواړو صوبو( بلوچستان او خیبر پښتونخوا) کنټرول د دوی له لاسه وځي.»
سهیل افریدي دغه راز ویلي، په خیبرپښتونخوا او بلوچستان کې د پاکستاني پوځ له لوري خراب شوی امنیتي وضیعت به نورو سیمو ته هم پراخ شي.
د افریدي په خبره، د پاکستاني جنرالانو له لوري د ناامنۍ رامنځته کولو موخه د ډالرو ګټل او په بهر کې د ټاپوګانو پېرل دي، خو دوی دې دا کار د پښتنو او بلوڅو د سرونو په بدل نه کوي.
نوموړي پاکستاني پوځ ته په اشارې ويلي، په خیبرپښتونخوا کې د شخصي ګټو لپاره نوې نظامي تجربې کېږي او خودساخته ناامنۍ جوړېږی. دوی دې دا کار زموږ په سیمه کې نه کوي، ځکه چې دا سیمه د نویو طرحو د تجربو لابراتوار نه دی.
شنونکي بیا په دې باور دي چې په پاکستان کې روان امنیتي وضیعت د دې هېواد د پوځ د جبر او د ملکي حکومت ناانډوله سیاستونو پایله ده.
د دوی په خبره، پاکستاني پوځ تل پښتانه او بلوڅ ملتونه محکوم کړي، مشران او د سر سړي یې وروژلي، بې کوره کړي یې دي او لسګونه زره نور یې تری تم او ورک کړي دي.
د سیاسي چارو شنونکی نجیب الله جامع وايي: « په پاکستان کې وروستی تشدد او افراطیت د دې هېواد د داخلي سیاست، نا عادلانه حکومتولۍ، جبر او د نظامیانو د وحشتونو او جنایتونو پر وړاندې د یوې برخې ملت غبرګون دی. همدا د پاکستان حکومت و چې خپل ملت یې محکوم کړ، پښتانه او بلوڅان یې ووژل، بې کوره او ورک یې کړل؛ همدا لامل شو چې دا خلک یې پر وړاندې وسله وال پاڅون وکړي.»
په ټوله کې وړاندیز دا دی چې که د پاکستان حکومت غواړي له موجوده وضعیت څخه خوندي ووځي، باید د پښتنو او بلوڅانو حقه حقوق ورکړي، غوښتنو ته یې مثبت ځواب ووايي او پوځ یې په سیاست کې له مداخلې لاس واخلي.
د پوځي چارو شنونکی حکمت الله حکمت وايي: « د ولسونو او په ځانګړې توګه د پښتنو او بلوڅانو پر وړاندې د پاکستان د پوځ او استخباراتو جګړه، ظلم دی. د دې ظلم پر وړاندې هرڅوک چې درېږي، جګړه یې حق ده. که پاکستان غواړي خپلې امنیتي ستونزې حل کړي، باید د دغو ولسونو حقه حقوق ورکړي، ولسواکي جاري وساتي، ملکي حکومت ته واک ورکړي، پوځ او استخبارات له سیاست څخه څنډې ته کړي.»
په دې وروستو کې د پاکستاني پوځ د ناسمو سیاستونو له امله په دې هېواد کې نا امني زیاته شوې، پر نظامیانو یې بریدونه ډېر شوي او هره ورځ درانه تلفات ور اوړي.
له اقتصادي پلوه یې افغانستان سره سوداګریزې لارې تړلې دي، کاروبارونه او صنعتي فابریکې یې فلج شوې دي او د دې کار تر ټولو دروند زیان د خیبرپښتونخوا او بلوچستان ولسونو ته رسیږي.
