د هرات ګذرې ولسوالۍ کې د مسافرو لېږدونکو موټرو ترمینل جوړولو چارې شاوخوا ۴۵ سلنه بشپړې شوې دي.
د ټرانسپورټ او هوایي چلند وزارت مسوولین وایي، د دې ترمینل لومړي او دویم فاز رغنیزي چارې ۷۵ سلنه بشپړې شوې دي او تر راتلونکې یوې میاشتې به د مسافرو لېږد رالېږد ته چمتو شي.
د ټرانسپورټ او هوایي چلند وزارت د تخنیکي او ساتنې خدماتو رییس حفیظ الله حلیمي وايي: « د ترمینل جوړولو چارې په چټکۍ سره روانې دي. زه کولی شم ووایم چې دا مهال یې د جوړولو کارونه تر ۴۵ سلنو مخکې تللي.»
په پام کې ده ۳۱ ټرانسپورټي شرکتونه په دې ترمینل کې فعالیت پیل کړي.
د ټرانسپورټي شرکتونو مسوولین وایي، د دې ترمینل ګټه اخستنې سره به د کاري فرصتونو زیاتوالي سربېره، ښار کې د ټرافیکو ګڼه ګوڼه او د لویو موټرو تګ راتګ هم کم شي.
د ټرانسپورټي شرکت مسوول وايي: « دا ترمینل به زموږ خلکو ته ډېر سهولتونه برابر کړي. دا ترمینل په معیاري بڼه جوړېږي، داسې چې زموږ سیمه کې به یې ساری نه وي.»
د ټرانسپورټي شرکت مسوول وايي: « د دې ترمینل د جوړولو کارونه په درېیو کالو کې بشپړېږي چې اوس یې یو نیم کال پوره شوی. کله چې د دې کارونه بشپړ شي، نو شرکتونه به ورته را ولېږدول شي او بیا به ګټه اخستنې ته وسپارل شي.»
د دې ترمینل رغنیزو چارو پیل سره به شاوخوا ۴۰۰ کسانو ته هم د کار زمینه برابره شي.
دلته په کار بوخت کسان د ورته زېربنایي پروژو پر زیاتوالي ټینګار کوي، ترڅو ورسره د خلکو کاري فرصتونه رامنځته شي.
د هرات اوسېدونکی ګل احمد وايي: « زه له دې وړاندې په ایران کې وم، زما کار د ودانیو نل دواني ده. د خدای فضل دی چې اوس هېواد کې ارامي ده او خلکو ته څه نا څه کار پيدا کېږي.»
د هرات اوسېدونکی محمود وايي: « که زموږ په خپل هېواد کې کار وي، ولې به نورو هېوادونو ته ځو. زه ډېر خوښ یم چې دلته کار کوم.»
د یادونې وړ ده چې د مسافرو لېږدونکو موټرو لپاره دا نړیوال ترمینل د هرات ګذرې ولسوالۍ کې پر زر جرېبه ځمکې د ۲۱ میلیون ډالرو په لګښت جوړېږي.
