هلمند کې کروندګر د وچکالۍ له امله ګڼو ستونزو سره مخ دي 

په هلمند ولایت کې  د وچکالۍ له امله له تېرو دوه کلونو راهیسې په دسیند کې هم اوبه کمې شوي،چې له امله یې هغه کروندګر اندېښمن دي،چې له همدې سیند نه به یې کرنیزو ځمکو ته اوبه ورکولې

د مختار او قلعه بست سیمه کې کروندګر وایي،که اوبه کمیږي، بزګران اړ دي،چې د خپلو کروندو ساتلو لپاره برمې ووهي. 

د هلمند ولایت یو تن کروندګر ګل اغا وايي:« ټول کښتونه مو د اوبو کمښت له امله وچ شوي دي. موږ اړ یو،چې برمې ووهو،ترڅو خپل کښت پرې خړوب کړو. » 

د هلمند ولایت یو بل کروندګر عبدالجبار بیا وايي:« کروندګر په داسې حال کې چې اوبه کمې وي، نه شي کولای،چې خپل  کر وکړي. په کوم ځای کې چې اوبه نه وي،چې نو هلته به حاصل له کومه شي.»

د اوبو کمښت له ستونزې سره سږ کال په ټول هلمند کې خلک لاس او ګریوان دي او اړ کیږي،چې د ځمکې لاندې اوبو څخه استفاده وکړي او یاهم د کښتونو د کرلو لاس واخلي.

د یاد ولایت د سیندیزي حوزې مشر محمد یعقوب قایم هم د بزګرانو او ځايي خلکو ستونزې مني او وايي، ستونزه په تیر کال کې د ورښتونو د کمیدو له امله ده او په خبره یې  روان کال کې  به د اوبو اندازه نوره هم کمه شي.

قایم زیاته کړه:«  وروره! تاسو ته خپله مالومه ده،چې موږ په ټول هېواد کې په دوو کالونو کې  یو سیلابي باران لرو. موږ په کاسه کې په ډېره کمه اندازه اوبه لرو. کافي اوبه نه لرو. دا کمه اندازه اوبه چې دې، د دې لپاره مو اصول جوړ کړي دي.» 

د هلمند په ځینو سیموکې وخت ناوخت د اوبو د کمښت له امله د عامو خلکو ترمنځ خپل منځي شخړي هم رامنځته کیږي. 

د دې ولایت د سیندیزې حوزې  مشر د هلمند ټولو کروندګرو ته سپارښتنه وکړه،چې د اوبو لګیدو په وخت کې دي له داسي  لارې استفاده وکړي، تر څو د اوبو سپما وشي.