د اسلامي امارت حکومت یو ځل بیا «حکومت د مطبوعاتو په هېنداره کې» تر نامه لاندې خلکو ته د حساب ورکولو پروګرام پیل کړ.
د دیني او فرهنګي ارزښتونو د ترویج، عدالت او قانون په اوونۍ کې د اطلاعاتو و فرهنګ، سرحدونو، قومونو او قبایلو او حج او اوقافو او یو شمېر نورو وزارتونو او ادارو مهمې لاسته راوړنې تشریح شوې.
د دې پروګرام پيل د اسلامي امارت مرکزي ویاند ذبیحالله مجاهد وکړ او په تېر یوه کال کې یې د یادو وزارتونو لویې لاسته راوړنې وړاندې کړې.
مجاهد د اطلاعاتو و فرهنګ وزارت په تړاو وویل چې دې وزارت د ګرځندوی او فرهنګي، تاریخي اثارو د ساتنې، د شعر او ترانې، رسنیز ډګر، کتابونو، فرهنګي هویت ساتنې په برخه کې د پام وړ لاسته راوړنې لرلې دي.
د هغه په خبره، د ۱۴۴۷ هجري قمري کال په ترڅ کې۱۰زره بهرنیو وګړو او شاوخوا ۸ میلیونه کورنیو سیلانیانو د هېواد له تفریحي سیمو او تاریخي، فرهنګي او طبیعي ځایونو لیدنه کړې.
د اسلامي امارت ویاند ذبیحالله مجاهد وايي: « په ۱۴۴۷ هجري قمري کال کې ۱۰ زره بهرنيو وګړو او شاوخوا ۸ میلیونه داخلي وګړو د هېواد له تاریخي، تفریحي او فرهنګي ځایونو لیدنه کړې. په همدې کال ۸۰۰ سیاحتي او زیارتي شرکتونو ته د فعالیت جواز ورکړل شوی. همدارنګه د ۶۰۰ شرکتونو جوازونه نوي شوي او د قوانینو د مخالفت له امله د ۸۰ شرکتونو جوازونه لغو شوي دي.»
د اسلامي امارت ویاند دغه راز د سرحدونو، قومونو او قبایلو چارو وزارت اړوند وویل چې تېر کال یې ۴۲۳ قومي شخړې حل او سلګونه غونډې جوړې کړې دي.
ذبیحالله مجاهد زیاتوي چې د ۱۴۴۷ هجري قمري کال په ترڅ کې د سرحدونو، قومونو او قبایلو وزارت له لوري ۴۲۳ قومي شخړې حل شوې چې له دې ډلې ۹۹ لویې شخړې او پاتې نورې وړې شخړې وې.
مجاهد په دې اړه وايي: « په ۱۴۴۷ هجري قمري کال د سرحدونو، قومونو او قبایلو وزارت له خوا په ټول هېواد کې ۴۳۲ شخړې هوارې شوې چې له ډلې یې ۹۹ سترې او ۳۳۲ نورې یې کوچنۍ شخړې وې.»
په ورته مهال، د حج او اوقافو وزارت تېر کال بېلابېلو شرعي برخو کې ۲۲۷فتواوې ورکړې دي.
د اسلامي امارت ویاند د حکومت د مطبوعاتو هندارې کنفرانس پر مهال په ۱۴۴۷ هجري قمري کال کې د هېواد د حج او اوقافو وزارت لاسته راوړنې له رسنیو سره شریکې کړې.
ذبیحالله مجاهد وویل، د ارشاد، حج او اوقافو وزارت بېلابېلو شرعي برخو کې د حنفي فقهي اصولو او قواعدو په رڼا کې ۲۲۷ فتواوې په کتبي او ۴۰۰ شرعې مشورې په شفاهي ډول صادرې کړې دي.
د نوموړي په خبره، یاد وزارت تېر کال د ۱۴۷جوماتونو د جوړولو او ۴۴ نورو بیارغونې له ډلې ۴۴ جوماتونه جوړ او ۲۸ترمیم شوي او د ۱۰۳ جوماتونو جوړولو او ۱۶نورو د ترمیم او بیارغونې چارې لا هم دوام لري.
د اسلامي امارت ویاند وايي: « د ۱۴۴۷ هجري قمري کال په ترڅ کې ۳۰ زره تنو حاجیانو ته د حج فریضې اداء کولو لپاره سعودي عربستان ته د تګ زمینه برابره شوې او ټوله پروسه یې په ښه ډول مدیریت شوې. همدارنګه ۱۰۸ عمرې ته استوونکو شرکتونو ته د فعالیت اجازه ورکړل شوې او ۷۹ زره عمره کوونکي کسان هم سعودي عربستان ته استول شوي دي. د فتوا په برخه کې، د حنفي فقې په رڼا کې په مختلفو برخو کې ۲۲۷ فتواګانې په کتبي او ۴۰۰ شرعي فتواګانې په شفاهي بڼه صادرې شوې دي.»
دغه راز ۳۰ زره افغان حاجیانو ته د سعودي عربستان د حج فریضې ادا کولو زمینې برابرولو ترڅنګ، ۱۰۸ د عمرې استوونکو شرکتو ته د جواز له ورکړې وروسته، څه باندې ۷۹ زره عمره کوونکي سعودي ته استولو د یاد وزارت نورې لاسته راوړنې وښودې.
د دې ترڅنګ، د روژې میاشت کې د هېواد په ۴۱۱ پوځي مرکزونو کې د قرانکریم ترجمې او تفسیر دورې دایرول او د ورځې له اړتیا سره سم د بېلابېلو دیني او ټولنیزو موضوعاتو په اړه د جمعې لمانځه ۵۲ خطبو وړاندې کولو د حج او اوقافو وزارت له نورو مهمو لاسته راوړنو شمېرل کیږي.
