اسلامي امارت خوست او پکتیکا کې له زلزله ځپلو سره د یو میلیارد افغانیو مرسته اعلان کړه

د هېواد په سویل ختیځو خوست او پکتیکا ولایتونو کې د وړمې شپې له زلزله ځپلو کورنیو سره د اسلامي امارت حکومت  په ګډون ګڼو بشري بنسټونو او هېوادونو مرستې اعلان کړي او د بشري مرستو د راټولولو غوښتنه یې کړې ده.

مخکېني ولسمشر محمد اشرف غني هم پر یادې پېښې خواشیني ښودلې او له کورنیو او بهرنیو مرستندویه سازمانونو یې غوښتي دي،چې له زلزله ځپلو کورنیو سره دې مرستې وکړي.

غني زیاته کړې:«په پکتیکا، خوست او د هېواد په نورو ولایتونو کې زلزله ځپلو کورنیو ته تسلیت وایم. شهیدانو ته یې د خدای (ج) له درباره د جنت او ټپيانو ته یې د عاجلې روغتیا غوښتنه کوم.» 

اخوا د کاتولیکانو مشر پاپ فرانسس د خوست او پکتیکا زلزله ځپلو کورینو ته دعا کړې او ویلي دي،چې د خلکو په مرستو سره دا شونې ده،ترڅو د افغانستان خلکو ځوریدنې راکمه شي.

هغه زیاته کړې:« زه د ټولو هغو کسانو لپاره دعا کوم،چې مړه شوي او یا یې کورنۍ له لاسه ورکړي دي. زه هېله لرم،چې د ټولو خلکو په مرستې سره به موږ وکولای شو، د افغانستان خلکو کړاوونه راکم کړو.» 

افغانستان کې د ملګرو ملتونو بشري مرستو همغږې کوونکې ادراه یا اوچا بیا ویلي،سیمه ته یې د سروې لپاره ټیمونه استولي او له خپلو همکارانو یې غوښتي دي، چې له سیمه ییز چارواکو سره دې په دې برخه کې مرستې وکړي.

یادې ادارې زیاته کړې:« د ملګرو ملتونو د بشري برخو له ټولو همکارانو غوښتل کیږي،چې له سیمه ییزو چارواکو ملاتړ دې وکړي، ترڅو په زلزله ځپلو سیمو کې سروې وکړي او بېړنۍ مرستې ورسوي.» 

له دې وراخوا چین، پاکستان او ایران هم افغانستان کې د وروستیو طبیعې پېښو له امله خواشیني ښودلې او درې واړو هېوادونو ویلي، د بیړنیو مرستو رسولو ته پوره چمتووالی لري. 

د افغانستان سرې میاشتې ادارې هم زلزله ځپلو سیمو ته روغتیایي ټیمونه استوليؤتر څو د ټپیانو په درملنه او لیږد کې هوايي ځواک سره مرسته وکړي.