د هلمند سنګین ولسوالۍ  اوسېدونکي له بهرنیو ځواکونو غرامت غواړي

د  هلمند ولایت سنګین ولسوالۍ د خلکو کورونه، باغونه، هټۍ او د عاید لاسته راوړلو سرچینې په تیرو جګړو کې له منځه تللي او اوسېدونکي یې د بهرنیو ځواکونو له لورې بریدونو کې د اوښتو زیانونو تاوان غواړي. 

د سنګین ولسوالۍ یو تن اوسېدونکی  عبدالجبارر وايي:« د دې ځای خلک په ډېر سخت حالت کې دي. دوی له لوږې سره مخ دي. تاسو دا وېجاړۍ ګورئ. زموږ باغونونه، ودانۍ، ټول نړېدلي دي.» 

د سنګین ولسوالۍ یوه اوسېدونکې بیا داسې وايي:« کور مې ویجاړ شوی دی. بمبار وشو، په یوه ورځ مې دوه زامن شهیدان شول. اوس یوازې زوی راپاتې دی،هغه هم ناروغ دی.» 

د هلمند شمالي ولسوالۍ سنګین کې خلک د خپلو ورانو کورونو د بیا ودانولو وس نه لري او په خبره یې د خپل اولاد ډودۍ هم نه شي موندلای.

واک  ته د اسلامي‌امارت له رسېدو سره د هلمند نورو ولسوالیو ترڅنګ سنګین ولسوالۍ ته هم ځینو موسیساتو مرستې رسولي.

د هلمند د کډوالو او بېرته راستنېدوونکو چارو د ریاست مشر مولوي الله داد انقیادي  وایي، دهلمند په سنګین ولسوالۍ کې تر دې دمه له ۲۰۰۰ زیاتو کورنیو سره مرستې شوي دي. 

هغه زیاته کړه:«  د هلمند ولایت په سنګین ولسوالۍ کې د اسلامي امارت سره شااوخوا ۲ زرره ۶۰۰ کورنیو سره د کډوالو چارو ریاست له خوا مرستې شوي دي.»  

له سنګین سربیره د هلمند په نورو ولسوالیو کې هم د تیر دولت او طالبانو ترمنځ د جګړو له امله  خلکو ته مالي او ځاني زیانونه اوښتي دي، چې په کي ملکي او دولتي تائسیسات هم له منځه تللي دي.