د خیبرپښتونخوا د اطلاعاتو او عامه اړیکو وزیر وایي، په بلوچستان کې اتیا سلنه خاوره د حکومت له واکه وتلې، خو د پاکستان ټولې رسنۍ پرې سترګې پټوي.
شفیع جان زیاته کړې، د پاکستان رسنۍ یوازې خیبرپښتونخوا ته پام اړولی او شپهو ورځ منفي تبلیغات کوي چې ګواکي دغه سیمه ناامنه ده.
هغه یوې خبرې غونډې ته ویلي، د ناامنۍ له امله د بلوچستان۸۰ سلنه سيمې د حکومت او امنيتي ادارو له واکه وتلې دي، خو په رسنيو کې پرې بحث نه کېږي او پر ځای یې تل خيبرپښتونخوا ناامنه ښودل کېږي او د پوځي عملياتو خبرې کېږي.
د خیبرپښتونخوا د اطلاعاتو او عامه اړیکو وزیر زیاته کړې: « زه اوس دا خبره کوم، نو زموږ ټولې رسنۍ پرې خفه کېږي، خو تاسې خبر یاست چې د بلوچستان اتیا سلنه خاوره د حکومت له واکه وتلې ده. هلته د پاکستان پيپلز ګوند ايالتي حکومت او په مرکز کې د مسلم ليګ(ن) حکومت واکمن دي او ټولې دولتي ادارې په ګډه کار کوي، نو بيا د دې ناکامي د چا ده؟»
د خیبرپښتونخوا د اطلاعاتواو عامه اړیکو وزیر دغه راز ادعا کړې چې د بلوچستان ۸۰ سلنه سيمې داسې حالت ته رسېدلې دي چې هېڅوک ورته تګ نه شي کولی.
شفیع جان ویلي، که دا د ايالتي او مرکزي حکومت ناکامي وي، بايد هغه ومني او استعفا ورکړي او که نه، نو دا د هغو دولتي ادارو ناکامي ده چې د هغه په وينا، د بلوچستان۸۰ سلنه سيمې يې له لاسه ورکړې دي.
شفیع جان ویلي: « موږ د پوځي عملياتو ملاتړ نه کوو او د تړلو دروازو تر شا شوې پرېکړې نه منو. موږ باور لرو چې د خبرو اترو له لارې مو سترې موخې ترلاسه کړي دي.»
نوموړي په پای کې ویلي چې دا د دوی لپاره د اندېښنې وړ ده چې د بلوچستان د ستونزو په اړه رسنۍ چوپې ساتل شوې دي، خو هڅه کېږي چې خيبرپښتونخوا د ناامنۍ سره برابره وښودل شي.
د چارو څارونکي د خیبرپښتونخوا پر اطلاعاتو او عامه اړېکو وزیر نیوکه کوي او وایي، هغه باید د خیبرپښتونخوا اصلي انځور خلکو ته وړاندې کړي.
د دوی په خبره، هلته هره ورځ بېګناه ولسي خلک وژل کېږي، خو دوی د امن خبره کوي.
د پوځي چارو شنونکی توریالی ځاځی وايي: « دا نا امنۍ خپله د پاکستان حکومت جوړې کړې او په دې بهانه پښتانه وژني. دوی څه د پاسه ۸۰ زره پښتانه وژلي. پاکستان د غرب پروژه ده او د هغوی سیاسي اهداف پلي کوي.»
د پوځي چارو شنونکی جنرال صادق شنیواری وايي: « د بلوچستان اوسنی حالت د پاکستان د ناکامو او غلطو پالیسیو پایله ده. دا ستونزه تاریخي او سیمه ییز عوامل هم لري.»
د خیبرپښتونخوا اطلاعاتو او عامه اړیکو وزیر داسې مهال د بلوچستان روان امنیتي وضعیت په اړه څرګندونې کوي چې په دې وروستیو کې د پاکستان پوځ تر کنټرول لاندې سیمې له سخت امنیتي کړکیچ سره مخ دي.
هلته هره ورځ د ناامنیو له امله ولسي خلک په ځانګړي ډول ښځې او ماشومان په نښه کېږي، خو مرکزي حکومت، پوځ او رسنۍ یې په اړه چوپه خوله دي.
