افغانستان کې د تاوتریخوالي پېښو په زیاتېدو سره بریټانیا ویلي،د داسې کومې ډلې ملاتړ نه کوي،چې غواړي د تاوتریخوالي له لارې سیاسي موخې ترلاسه کړي او نه به هم پهخپله خاوره کې کوم سیاسي پلان چمتو کېدو ته اجازه ورکړي.
په دوحه کې د افغانستان لپاره د بریتانیا شارژدافیر هوګو شارټر وايي:« بریتانیا د افغانانو په ګډون د هېڅ هغه چا ملاتړ نه کوي،چې غواړي د تاوتریخوالي له لارې سیاسي بدلون ته لاره هواره کړي، یا د سیاسي موخو لپاره د تاوتریخوالي د هڅولو کوم فعالیت په افغانستان کې وکړي. بریټانیا به اجازه ورنه کړي،چې د دغه هېواد خاوره د کوم سیاسي پلان د چمتو کولو لپاره وکارول شي. موږ نور هم په کلکه له دې کاره منع کوو.»
د سیاسي چارو شونکی سید بلال فاطمي وايي:« بریټاینا په هېڅ حالت حاضره نه وه،چې د اسلامي امارت حکومت پر رسمیت وپېژني یا اړېکې ورسره ولري. د مقاومت له جبهې سره د دوی اړېکې ډېرې نږدې وې، چون بریټانیا د پاکستان شاته ولاړه ده، پاکستان کې د مقاومت جبهې خلک دي او هغه هم له انګلستانه دي. صلاح الدین د انګلستان پاسپورت لري او په پاکستان کی دی. نو که چېرې د دوی ملاتړ نه کوي، نو دوی باید د بریټانیا د تبع په حیث هغه منع کړي. ځکه پاسپورت یې د بریټانیا ده، باید له دې حرکته یې منع کړي. خو تاسې ګورئ، صلاح الدین ترکیې ته ځي، په ترکیه کې کېني،خبرې کوي، په پاکستان کی دی.»
د مقاومت په نوم جبهه چې مشران یې د امریکا متحده ایالتو، لندن او فرانسه کې دي،هڅه کوي له هرې ممکنې لارې اسلامي امارت ته سرخوږی جوړ کړي،خو طالبانو په حضور کې تراوسه پورې کوم جدي ګواښ نه دی پېښ کړی.
شارټر وايي، له اسلامي امارت سره افغانستان کې له تعامل پرته بله لار نه لري او پر وینا یې دوی به دا کار وکړي.
هغه زیاته کړه:« په افغانستان کې د سولې او ثبات د ودې، افغانانو ته د بشردوستانه مرستو د رسولو او د امنیت په اړه د ګډو اندیښنو د حل لپاره، بې له دې چې د افغانستان له اوسنۍ ادارې سره په عملي توګه ښکیل شو،بله لاره نه شته او دا هغه څه دي،چې موږ یې کوو.»
د سیاسي چارو شنونکي بیا وايي، افغانستان کې هغه ډلې او ټپلې چې نړیوال ملاتړ ونه لري،د اندېښنې وړ نه دي او په اسانه مهار او پاشل کیدای شي.
دوی وايي، هغه سیاستوال،چې په جګړې باور لري،هڅه کوي د سیمې له استخباراتو سره نږدې شي او د جګړې د دوام لپاره پیسې او امکانات ترلاسه کړي.
د شنونکو پر وینا، په حقیقت کې دا هېوادونه د افغان کډوالو له ورتګ وېره لري.
د یادونې وړه،چې له دې وړاندې د امریکا متحده ایالتو هم ورته دریځ اعلان کړی، خو د افغانستان لپاره یې ځانګړي استازي بیا د اسلاميامارت له هغو مخالفو څېرو سره لیده کاته وکړل،چې افغانستان کې د اسلامي امارت خلاف خلک جګړې ته هڅوي.
اوس به ولیدل شي،چې بریټانیا او د امریکامتحده ایالت په خپل دریځ پاتې کېږي او که د فشار لپاره به افغانستان کې د طالبانو له مخالفو وسلوالو سره په ښکاره او پټه توګه همکاري کوي، خو ټینګار دادی،چې د امریکا متحده ایالت او د بریټانیا په ګدون دې نور هېوادونه هغه ډلې تورلیست کې شاملې کړي،چې دافغانستان ثبات او سوله ننګوي او تاوتریخوالی خوروي.
