د نورستان ولایتي ادارې د معلوماتو له مخې، وروستیو سېلابونو د عامو خلکو د استوګنې کورونو، دوکانونو، هوټلونو او ګڼو دولتي تاسیساتو ته پراخ زیانونه اړولي دي.
چارواکي اټکل کوي چې د دغو ویجاړیو ټولیز مالي زیان شاوخوا ۴۰ میلیون ډالرو ته رسېږي.
د نورستان مرستیال والي فيصل مختار وايي: « په ویجاړو شویو ځایونو کې زموږ د ښاروالۍ دفتر، هوټل او پارک هم شامل دي. همدارنګه د خلکو ډېر هوټلونه او شتمنۍ هم ویجاړ شوي. زموږ د اټکل له مخې، له ۳۵ تر ۴۰ میلیون ډالرو زیان اوښتی.»
سېلاب ځپلي بیا وایي، سېلابونو د دوی شتمنۍ، کورني وسایل او د ژوند لومړني امکانات له منځه وړي.
دوی له حکومت، مرستندویه بنسټونو او نړیوالو ادارو غواړي چې ژر تر ژره ورته خوراکي توکي، سرپناه او نورې اړینې بشري مرستې ورسوي.
له سېلابونو یو تن اغېزمن شوی کس وايي: « دلته ډېره زیاته تباهي شوې، موږ له حکومت، نړیوالو ادارو او موسسو څخه غواړو چې خپل ټیمونه راواستوي.»
یوبل اغېزمن شوی کس وايي: « زه له اسلامي امارت، نړیوالو موسسو او ملي سوداګرو جدي هیله کوم چې زموږ د خلکو مرسته وکړي. تر اوسه هم د ډېرو خلکو جسدونه تر خټو لاندې دي.»
بله خوا، د نورستان ولایتي ادارې مسوولین وایي، د سېلاب ځپلو کورنیو لپاره د بېړنیو مرستو لړۍ پیل شوې ده.
د دوی په خبره، حکومت او بېلابېلو مرستندویه موسسو د مرستو ژمنې کړې چې یوه برخه یې عملي شوې او د پاتې مرستو د رسولو بهیر هم روان دی.
نورستان والي زین العابدین عابد وايي: « نورستان ته مرستې را روانې دي، همدارنګه د ریاست الوزرا مقام له خوا هم ټیم را روان دی چې نغدي او غیر نغدي مرستې ورسره دي. دغه راز د نورو وزارتونو او دارو مرستې هم را روانې دي او دا مهال پر لارو دي.»
د روانې اوونۍ د دوشنبې په مازیګر د نورستان مرکز پارون کې د شدیدو ورښتونو له امله سېلابونه راغلل چې خلکو ته یې د سر او مال درانه زیانونه واړول.
د مسوولینو په خبره، د دغو سېلابونو له امله تر اوسه د ۲۳ تنه مړینه تایید شوې او لسګونه نور زخمیان او لادرک دي.
