د هېواد په ختیځ ولایت نورستان کې درانه سېلابونه راوتلي چې د ګڼو دولتي ودانیو او مارکېټونو ویجاړولو ترڅنګ یې، خلکو ته درانه ځاني زیانونه هم اړولي دي.
د نورستان والي چې خپله هم د ژغورنې په چارو بوخت وو، له شمشاد سره په خبرو کې د را وتلیو سېلابونو د زیانونو په اړه وايي چې د اوس لپاره د اوښتي ځاني او مالي زیان په اړه څه نه شي ویل کېدای.
قاری ذین العابدین عابد وايي: « زموږ ښاروال صاحب سره له ملګرو لادرک دی، همدارنګه د لومړي کنډک قوماندان او ملګري یې هم تر اوسه لا درک دي. همدارنګه ګڼ شمېر دوکانداران، سیلانیان او نور خلک لادرک دي. د اوس لپاره کار روان دی، کله چې معلومات وشي، له تاسو سره به یې هم شریک کړو. زه له حکومتي چارواکو، نړیوالو ادارو ، موسساتو او ملي سوداګرو غږ کوم چې د نورستان له خلکو سره مرسته وکړي.»
د نورستان والي ویاند هم شمشاد سره خبرو کې وايي چې دغو سېلابونو په مرکز پارون کې دولتي ودانۍ، مارکېټونه او د عامو خلکو کورونه لاندې کړي او سیمې ته غځېدلې لارې هم تړلې شوې دي.
فریدون صمیم پر مرستندویه ادارو غږ کړی چې سېلاب ځپلو خلکو سره بېړنۍ مرستې وکړي.
د نورستان والي ویاند وايي: « دلته پارک و، د ښاروالۍ ریاست، بازار او هوټلونه ټول سېلاب وړي. زموږ د سرې میاشتې ټیمونه، حوادث او امنیتي ځواکونه بوخت دي او د ژغورنې عملیات ترسره کوي. د ګڼو ملکي وګړو ترڅنګ، زموږ دولتي کارکوونکي هم لادرک دي. زموږ د معلوماتو له مخې، خلکو ته درانه ځاني او مالي زیانونه اوښتي، خو کره شمېرې یې نه دي څرګندې.»
د نورستان په مرکز پارون کې دا سېلابونه داسې مهال را وتلي چې د ګرمۍ موسم دی او د هېواد د بېلابېلو سیمو خلک د تفرېح لپاره پارون ته ځي. دا چې دغو سېلابونو سیلانیانو ته هم کوم زیان اړولی که نه، په اړه یې څه نه دي ویل شوي.
پلازمېنه کابل کې له پېښو سره د مبارزې او چمتووالي ادارې ویاند حافظ محمد یوسف حماد وايي، تر اوسه نورستان کې د را وتلیو سېلابونو له امله ۲۰ تنه شهیدان، شاوخوا ۸۰ تنه ټپیان او له ۱۰۰ زیات لادرکه دي.
د حماد په خبره، دغو سېلابونو ګڼ شمېر کورونه، کرنیزې ځمکې او عامه تاسیسات ویجاړ کړي. نوموړي څرګنده کړې چې د ژغورنې عملیات دوام لري او له خلکو یې غوښتي چې له سېلابي سیمو دې لرې اوسي.
په ورته مهال، په راپورونو کې ویل شوي چې د ډیورنډ فرضي کرښې کوزې غاړې ته په لواړګي کې هم سیلابونه راوتلي او د افغان کډوالو یوه لارۍ یې له ځان سره وړې ده.
په دغو سېلابونو کې افغان کډوالو ته د اوښتې مرګ ژوبلې په اړه څه نه دي ویل شوي.
