سعودي عربستان ته د افغان حاجیانو د لېږد لړۍ پیل شوه 

د حج فریضې ادا کولو لپاره د افغان حاجيانو لومړۍ جوپه د یکشنبې پر ورځ  د «۱۴۰۱ کال د غبرګولې پر ۲۲ مه» له کابله سعودي عربستان ته ولېږدول شوه.

دغه افغان حاجیان د اريانا افغان هوايي شرکت په یوه الوتکه کې جدې ښار ته وړل کیږي.

د حاجیانو د لېږ لړۍ په پیل غونډه کې د ریاست  الوزرا مرستيال مولوي عبدالسلام حنفي وویل، افغان حاجيانو ته یې د انتقال، اوسېدو، خوړو او نورو برخو کې ښه خدمات برابر کړي دي.

حنفي زیاته کړه:« د ا.ا د مسوولینو او کارکوونکو او همدارنګه د حج او اوقافو وزارت په هڅو دا لړۍ تر دې ځایه را ورسېده. موږ هیله من یوو چې د هېواد په کچه ۱۳۵۸۲ کسان له پلازمېنې او زونونو څخه د حج مراسمو د ادا کولو په موخه سعودي عربستان ته ولېږدوو.»

د ریاست الوزرا سیاسي مرستیال مولوي عبداکبیر بیا وايي، افغانستان د اسلامي نړۍ له هېوادونو سره غوره اړيکې غواړي او له افغان حاجيانو يې وغوښتل،چې د اسلامي نړۍ ټولو مسلمانو حاجيانو ته دې د افغانانو د ورولۍ پیغام ورسوي.

عبدالکبیر زیاتوي:« اسلامي امارت د نړۍ له ټولو مسلمانانو سره د ورورۍ  اړیکې غواړي. اسلامي امارت د نړۍ له ټولو مسلمانانو سره د ښو اړیکو پیغام لري. تاسې کولای شي،چې د هر مسلمان حاجي، که هغه د هر هېواد وي، چې ورسره مخ کېږئ،د اسلامي امارت په استازیتوب، د ورورۍ او خواخوږۍ پیغامونه هغوی  ته ورسوئ.» 

دغو مراسمو کې د ارشاد حج او اوقافو سرپرست وزیر مولوي نور محمد ثاقب  بیا خوښي وښوده،چې له دوه کالو ځنډ وروسته د حج فریضې ادا کولو مراسم پيل شوي او زرګونه افغانانو ته په کې سهم ورکړل شوی دی.

ثاقب زیاته کړه:«څوک وايي، موږ به سږ کال حج ته ولاړ شو او که نه؟ زه دوی ته وایم،څوک چې لاړل، د هغوی لپاره هم خوشالي ده او که سږ کال پاتې شول، هم ورته خوشالي ده. زموږ د ټولو دا یوه خوشالي بس ده،چې الحمد الله هېله پیدا شوه،چې له نړۍ  دا حج حذف نه کړی شو. دښمن پر دې بریالی نه شو،چې زموږ د اسلامي ابادي او دا ماڼۍ راته کمزورې کړي.» 

سعودي عربستان سږ کال يو میليون مسلمانانو ته د حج فريضې ادا کولو اجازه داسې مهال ورکوي،چې له تیرو دوه کالونو د کورونا وبا له امله د حج مراسم ځنډیدلي وو.

سږکال د تیرو کلونو  پرتله د حج مراسمو کې د افغانانو سهم نیمايي دی. 

درې کاله وړاندې نږدې ۲۶ زره افغانانو د حج مراسمو کې ګډون کړی،خو سږکال شااوخوا ۱۳۵۰۰ افغان حاجيان سعودي عربستان ته د حج فریضې ادا کولو لپاره ځي.