د بدخشان ولایت په یفتل ولسوالۍ کې د جمعې په ورځ د «سپاهي میهن» په نوم نوې وسلهوالې ډلې له بریدونو وروسته، د دې بریدونو ډېر عوامل نیول شوي دي.
اوسمهال په یاده ولسوالۍ کې وضعیت په نورمال حالت کې دی او حکومتي چارې هلته د امنیتي او استخباراتي ځواکونو په شتون کې منظمې روانې دي.
د اسلامي امارت د پوځ لوی درستیز هم له رسنیو سره په خبرو کې ویلي چې د مقاومت، جبهه ازادي او سپاهي میهن په نوم ډلې تش په نوم فعالیتونه کوي او په خبره یې، نه شي کولی د اسلامي امارت له ځواکونو سره مقابله وکړي.
قاري فصیح الدین فطرت ویلي: « یو شمېر ډلې دي چې یوازې د نوم په اعلانونو سره خپل شتون ښيي او ځینې وختونه په لرې پرتو ځایونو کې بیرغونه پورته کوي. دا د مقاومت جبهه، د آزادۍ جبهه او اوس سپاهي میهن جبهه، دا ټول هڅه کوي تش په نوم غږ پورته کړي، خو هېڅکله د دې وړتیا نه لري چې زموږ له ځواکونو سره مقابله وکړي. دې خلکو دلته هم خپل نوم اعلان کړ، خو په ډېر لږ وخت کې مهار او تارومار شول.»
په ورته مهال، تازه بیا د یادې ولسوالۍ امنیه قومندان وایي چې وضعیت اوس په دې ولسوالي کې په بشپړ ډول تر کنټرول لاندې دی.
اظهار الدین نوري زیاته کړې: « په کوز یفتل کې امنیتي وضعیت په بشپړه توګه کنټرول دی، زموږ امنیتي او استخباراتي ځواکونه په بېلابېلو جزوتامونو کې ځای پرځای دي او د امنیت په اړه هېڅ ډول اندېښنه نه شته.»
د بدخشان امنیه قومندانۍ ویاند د جمعې په ورځ له شمشاد سره په خبرو کې ویلي وو چې دغو مغرضو او غیر مسووله وسله والو د چارواکو له نه شتون چې په رخصتۍ تللي وو، ناوړه ګټه پورته کړې او دا برید یې کړی، خو په خبره یې امنیتي ځواکونه په وخت سیمې ته رسېدلي او وضعیت یې ډېر ژر تر خپل کنټرول لاندې راوستی دی.
د نظامي چارو شنونکی توریالی ځاځی وايي: « افغانستان کې یوې وړې امنیتي پېښې ته هماغه پخواني جنایت کاران، بهرنۍ رسنۍ او مخالفان دومره تبلیغات کوي چې هېڅ حد او اندازه نه لري. دا اووه یا اته کسان چې پر یفتل ولسوالۍ یې برید کړی و، نیول شوي او اعترافونه یې هم کړي چې په رسنیو کې نشر شول. موږ باید اوس د خپل راتلونکي نسل لپاره کار وکړو، نه د یوه بل نسل نا ارامه کولو لپاره.»
له دې هره وروسته، پوښتنه دا ده چې دې نوې وسلهوالې ډلې موخې څه وې چې دا ډول اقدامات یې ترسره کړل؟
د چارو شنونکی اسماعیل ځدراڼ وايي: « دا خلک شر پسند دی او نه غواړي په افغانستان کې امن، سوله او ثبات واکمن وي. افغانستان دا مهال ښه روان دی او ورځ تر بلې پرمختګ کوي. د سیمې هېوادونه او استخباراتي کړۍ نه غواړي چې افغانستان خپلواک او ناپېیلی وي. زموږ غوښتنه له امارت څخه دا ده چې دا ډول کس په جدي توګه وځپي.»
د معلوماتو له مخې، تر اوسه د دې نوې ډلې چې د یفتل ولسوالۍ پر ودانۍ یې وسلهوال برید کړی وو، شاوخوا ۱۰ تنه غړي نیول شوي او سیمهییزو ځواکونو د پاتې کسانو د نیولو له هڅو خبر ورکوي.
د ټولنیزو رسنیو کاروونکو د بدخشان ولایت پر یفتل ولسوالۍ وسله وال برید ته توند غبرګونونه ښودلي او ویلي یې دي چې اسلامي امارت باید د داسې مغرضو کړیو پر وړاندې جدي ګامونه پورته کړي، ترڅو په افغانستان کې تامین امنیت ته خنډ جوړ نه شي.
