د تخار ولایت رستاق ولسوالۍ اړوند هغه کلي ته روان یو چې د تابان په نوم یوه مېرمن او اووه کلن زوی یې د خاوند له لوري له شاوخوا اووو کالو راهیسې په کورني زندان کې شپې سبا کوي.
د دې کورني بند تر شا اصلي کیسه دا ده چې د بندي کړې ښځې خاوند دویم واده هم لري او ویل کېږي چې د کورني تاوتریخوالي له امله یې لومړۍ مېرمن بندي کړې ده.
د تخار ولایت رستاق ولسوالۍ امنیه قومنداني وایي، د پېښې په تړوا شکمن کس نیول شوی چې له پلټنو وروسته به یې د قانون منګولوته وسپاري.
د تخار ولایت رستاق ولسوالۍ امنیه قومندان نظام الدین نظامي وايي: « اووه کاله کېږي چې د تابان په نوم دا ښځه په همدې کوټه کې بندي ده. دا داسې یوځای دی چې حیوان هم په کې بند کړي، ګوزاره نه شي کولی. له یوې کوچنۍ کړکۍ څخه ډوډۍ وراچوي، بیا یې دا زوی هم چې د کاکا کره و، هغه یې هم راوستی او له مور سره بندي کړی. موږ دا ښځه او ماشوم وژغورل او د هغې خاوند مو ونیو او محکمې ته مو تسلیم کړ.»
په ورته مهال، د سیمې اوسېدونکي بیا دا پېښه ستر وحشت بولي او عامیلینو ته یې د قانون په رڼا کې د سزا ورکولو غوښتنه کوي.
د سیمې اوسېدونکی بواخان وايي: « له دویمې نکاح وروسته اووه کاله د تابان ګل په نوم دا ښځه دلته بندي کړې وه. دویمې ښځې یې د مېړه په وسیله دا لومړۍ ښځې زنداني کړې ده. موږ د اسلامي امارت چارواکو ته وایو چې د قضیې اصلي لامل دویمه ښځه ده چې باید ویې نیسي او د قانون منګولو ته یې وسپاري.»
د سیمې اوسېدونکی وايي: « دا هېڅ انسانیت نه دی چې پر یوه مظلوم کس دې دومره ظلم وشي. د دې قضیې اصلي لامل دویمه ښځه ده چې باید سزا ورکړل شي.»
تابان او ماشوم زوی یې اوس تر درملنې لاندي دي. هغوی له ژغورنې وروسته د رستاق ولسوالۍ روغتون ته لېږدول شوي، ترڅو درملنه او اړین روغتیايي خدمات ورته وړاندې شي.
ډاکټران وایي لومړني خدمات ورته وړاندې شوي، خو وايي چې د سختو شکنجو له امله په روحي او رواني ناروغیو اخته شوي او باید مجهزو روغتونونو ته ولېږدول شي.
د رستاق ولسوالۍ روغتون کې ډاکټر احسان الله نوري وايي: « رو غتون کې ورته لومړني خدمات وړاندې شوي، خو صدمه یې لیدلې او باید مجهز روغتون ته ولېږدول شي. موږ تابان او خلیل احمد ته تر خپلې وسې خدمات وړاندې کړل. تابان په رواني ناروغۍ اخته ده او زوی یې خلیل احمد په شدیده خوارځواکۍ اخته دی. باید مرکز ته ولېږدول شي، ترڅو یې اساسي درملنه وشي.»
د تخار ولایت امنیه قومندانۍ له ولسونو غوښتنه کړې چې له داسې شکمنو قضیو سره د مخ کېدو پر مهال دې امنیتي اورګانونو سره همکاري وکړي.
دا په داسې حال کې ده چې په کابل او یوشمېر نورو ولایتونو کې د کورني زندان ورته څو پېښو ته رسېدنه شوې.
