د ملګرو ملتونو د بشري مرستو همغږۍ اداره(اوچا) وايي، افغانستان د هغو هېوادونو له ډلې دی چې لاهم په کې په پراخه کچه ماینونه او نا چاوده توکي شته دي.
د دې ادارې د راپور له مخې، یوازې په روان کال کې نږدې۱۸۰ کسانو ته د ماینونو او نا چاودېدلو توکو له امله مرګ ژوبله اوښتې چې ۷۵ سلنه یې ماشومان دي.
د اوچا راپور کې راغلي: « ماینونه او نورو نا چاودېدلي مهمات په عملي توګه د سیمه ییز پرمختګ مخه نیسي. دغه راز، په ماینونو ککړې ځمکې له کرنې پاتې کیږي، د سړکونو جوړونه له خنډ سره مخ کوي، د بېځایه شویو راستنېدل ستونزمنوي او همدا راز، ښوونځیو ته د ماشومانو تګ له خطر سره مخ کوي.»
د دې راپور له مخې، افغانستان د نړۍ له هغو هېوادونو څخه دی چې تر ټولو زیات په ماینونو ککړ دی او د بوسنیا، کمبودیا، ایتوپیا، عراق او اوکراین چې د نړۍ په کچه پر ماینونو او ناچاودېدلو توکو ترټولو ډېرککړ هېوادونه دي، ترڅنګ یې افغانستان هم یادیږي.
اوسمهال په نړۍ کې ماین پاکونه نه یوازې یو خیریه کار نه بلل کیږي بلکې د هرې سترې بنسټیزې پروژې د پیل لومړنی شرط هم بلل کېږي.
په داسې حال کې چې نږدې ټول هغه ټرانسپورټي دهلېزونه چې مرکزي اسیا د هند له سمندري بندرونو سره نښلوي، د افغانستان له لارې تېریږي. په دغو دهلېزونو کې افغان ټرانس رېل پټلۍ، د ټاپي ګازو نل لیکه، کاسا زر د برېښنا لېږد پروژه او نورې سترې سیمه ییزې پروژې په کې شاملې دي.
