Skip to content
د افغانستان اسلامي امارت د کلیو د بیارغونې او پراختیا وزارت چارواکي د لومړي ځل لپاره د غور و لایت مرکز فیروزکوه ښار ته په سفر تللي او هلته یې له ځايي چارواکو سربېره ولسي خلکو سره هم لېده کاته کړي دي.
غور ته د تللي پلاوي مشر وايي،موخه یې د خلکو او ځايي ادارو ترمنځ همغږي او د دې وزارت اړوند پروژو لیدنه ده.
د کلیو بیارغونې او پراختیا وزارت مرستیال مولوي عبدالرحمن حليم وايي:«موږ له کابله د دې لپاره راغلي یو،چې دلته مسوولینو سره وګورو، کړنې او برنامې یې وګورو، د شرکتونو له استازو سره همغږي ښودل او هغو سره لېده کاته، په کارونو کې ورسره مرسته کول. د اسلامي امارت څه چې له وسه پوره کوي مرسته به کوي.»
د غور ولایت د کلیو د بیا رغونې او پراختیا ریاست مشر مولوي محمد ادریس شریعت له یاد پلاوي غوښتنه وکړه، چې دغه ولایت ته دې د بیا رغوونې پروژې منظور کړي.
شریعت زیاته کړه:« هیله ده،چې موږ وکولی شو،پراختیايي او ودانیز خدمات وړاندې کړو او د هېواد په ښېرازۍ کې د پام وړ ګامونه پورته کړو.»
د غور اوسیدونکو له مرکزي حکومت نه تللي پلاوي سره لېدنو کې د یاد ولایت لپاره د د بیارغونې پروژو او بريښنا غوښتنه کړې ده.
مسوولینو ځايي خلکو ته ډاډ ورکړی دی،چې له برېښنا سربېره به یې په نورو برخو کې شته ستونزې هم حل کړي.
له مرکزه د تللي پلاوي غړی مولوي محمد شریف وايي:« د ولایت په کچه باید د برېښنا ستونزه حل شي. ځینو ځایونه کې برېښنا شته او ځینې بیا بې برخه دي. غوښتنه مو دا ده چې دې ستونزې ته مو رسېدنه وشي.»
د یادونې وړ ده،چې د کلیو او بیا رغونې ریاست یوه اوونۍ وړاندې د دغه ولایت په دولت یار ولسوالۍ کې د یو میلیون افغانیو په لګښت د روغتیایي اوبو رسولو پروژه پرانېستله.
