د افغانستان اسلامي امارت د بهرنیو چارو وزارت په یوه خبرپاڼه کې،چې مولوي امیر خان متقي له هندي پلاوي سره لیدلي،ویل شوي،چې هند باید خپله استازولي پرانیزي او افغانستان کې خپلې نبمګړې پروژې بشپړې کړي.
د خبرپاڼې یوه برخه:«په ملاقات کې د افغانستان او هندوستان تر منځ پر دیپلوماتیکو اړیکو، دوه اړخیز تجارت او بشري مرستو خبرې وشوې. ټینګار وشو چې هندوستان په افغانستان کې باید خپلې درول شوې پروژې له سره پيل کړي، خپل دیپلوماتیک شتون فعاله کړي او افغانانو ته قونسلي خدمات وړاندي کړي خصوصا د افغان محصلینو او ناروغانو لپاره.»
د پوهنتون استاد فیض محمد ځلاند د وايي:« هند او د سیمې نور هېوادونه غواړي،چې له طالبانو سره خپلې ترېنګلې اړېکې ورغوي. افغانستان کې خپلې پانګونې ته دوام ورکړي، خپلې نیمګړې پروژې پوره کړي. په لویه کې د سیمې په ثابت او ټېکاو کې خپل مهم رول لوبوي. د اسلامي امارت مشرانو له لوري دوی ته ښه راغلاست او دوی ته د امنیت برابرول به وکولای شي،چې خپلې نیمګړې پروژې بشپړې کړي او د افغانستان په پرمختګ کې یو مهم رول ولوبوي.»
هند له کابل سره د پخوا په څېر د ښو اړیکو او مرستو پر دوام ټینګار کړی دی او پرېکړه شوې،چي د دواړو هېوادونو تر منځ به راشه درشه زیاتیږي.
د سیاسي چارو یو شمېر شنونکي پر دې باور دي، افغانستان کې د جګړې یو بل ستر لامل د هند او پاکستان نیابتي جګړه او منفي رقابت وه چې د افغانستان له جغرافیې استفاده کوله.
د سیاسي چارو شنونکی اختر محمد راسخ وايي، تېرو شلو کلونو کې افغان حکومت ونه توانېده، د هند او پاکستان ترمنځ خپلواک او پر ملي ګټو ولاړ سیاست غوره کړي.
هغه زیاته کړه:«هند ته یې بلنه ورکړه،چې راشئ، خپل سفارت پرانېزئ، موږ ستاسو د سفارت عام او تام امنیت نیولی شو اوله تاسو سره غواړو،چې ښې اړیکې او تاریخي اړیکې بیا ټېنګې کړو. دغه خبرپاڼه د پاکستان د استخاباراتو پر ټټر نښه وېشتل دي. هغوی په ارامه نه کېني. هغوی هېچ کله نه غواړي، چې افغانستان کې داسې یو نظام رامنځته شي،چې هغه نظام په ټول افغانستان کې امن،امنیت،پرمختګ او له هند سره ښیې اړیکې جوړول، هېچکله د پاکستان پر ګټه نه تمامېږي.»
