هغه افغان ستورمزلی چې له نن څخه یې څو لسیزې وړاندې د نورو بهرنیو ستورمزلو سره یوځای د فضا په لوري د الله(ج) پاک کتاب، قرانکریم له ځانه سره انتقال او تلاوت کړ.
نوموړی لومړنی او یوازینۍ افغان ستورمزلی و چې څو ورځې وړاندې په جرمني کې د ورپېښې ناروغۍ له امله وفات شو او جنازه یې د اسلامي امارت له خوا کابل ته را انتقال شوه.
د نوموړي جنازه د یو لړ ځانګړو تشریفاتي مراسمو په ترڅ کې اداء او مړی یې د کابل مرنجان غونډې پر مخ خاورو ته وسپارل شو.
د اسلامي امارت چارواکي د عبدالاحد مومند مړینه د افغانستان لپاره ضایع بولي او پر افغان کدرونو غږ کوي چې خپلې پوهې او تجربې باید له نورو سره شریکې کړي.
د بهرنیو چارو وزارت د تشریفاتو رییس عبدالباري عمر وايي: « موږ باید د خپل هېواد د پرمختګ لپاره کار وکړو. نن ژوند شته او باید ترې د هېواد آبادولو لپاره ګټه واخلو.»
د افغاني سرې میاشتې ټولنې رییس شهاب الدین دلاور وايي: « زه د اسلامي امارت د ټولو مشرانو په وکالت د مرحوم عبدالاحد مومند کورنۍ ته تسلیت وایم.»
د اسلامي امارت یو شمېر نور چارواکي د هېواد پر ځوانانو غږ کوي چې عصري ټېنکالوژۍ سره ځانونه بلد کړي، ترڅو وکولیی شي د عبدالاحد مومند په څېر د افغانستان نوم روښانه کړي.
دوی له هېواده بهر تللیو افغان شخصیتونو او پانګوالو څخه غواړي چې هېواد ته د خدمت په موخه راستانه شي.
د اقتصاد وزارت معین عبداللطیف نظري وايي: « زموږ ځوانان باید د مومند په ګډون زموږ له غوره کدرونو زده کړه وکړي، ترڅو موږ د یوه خپلواک، ازاد او اباد افغانستان لیدونکي شو او دا میراث نورو نسلونو ته ولېږدوو.»
د بهرنیو چارو وزارت د تشریفاتو رییس عبدالباري عمر وايي: « وړاندې له دې چې موږ هم نړۍ پرېږدو، راځئ هغه څه نورو ته ور زده کړو چې زموږ زده دي.»
له دې سره، د عبدالاحد مومند پخواني همکاران ټینګار کوي چې د مومند فکر باید د هېواد ځوانانو ته ورسېږي او نوی نسل له ټېنکالوژۍ سره بلد او ګټه ترې پورته کړي.
د سیاسي چارو شنونکی عبادالله صادق وايي: « باید خپل بچي په لوی، لوړ او آسماني فکر وروزو، ترڅو افغانستان ته د مومند په څېر شخصیتونه ورکړو. اوس د ټېکنالوژۍ عصر دی، خو موږ صفر کې پراته دی، موږ د مومند په څېر فضا ته د تګ ټېکنالوژۍ غواړو، باید دا سفر له دې ځایه پیل کړو.»
مرحوم عبدالاحد مومند د افغانستان د هوايي ځواک وتلې پیلوټ وو چې په ۱۹۸۸ زېږدیز کال کې یې فضا ته سفر وکړ او له هغه ځایه یې د وخت له ولسمشر ډاکټر نجیب الله سره په پښتو ژبه خبرې وکړې او له دې سره پښتو د نړۍ څلورمه ژبه شوه چې په فضا کې پرې خبرې وشوې.
د مرحوم عبدالاحد مومند جنازه دوشنبه د چنګاښ په ۱۵ مه د کابل ښار په عیدګاه جومات کې اداء او د یو لړ تشریفاتو په ترڅ کې د کابل ښار مرنجان تپې کې خاورته وسپارل شوه.
