د امریکا متحده ایالتو د بهرنیو چارو وزارت وړمه ورځ د نړۍ په۲۰۰ هېوادونو کې له څېړنو وروسته د مذهبي تاوتریخوالي په هکله تازه کلنی راپور خپور کړ.
په راپور کې ویل شوي، په افغانستان کې د اسلامي امارت له واکمن کیدو را وروسته مذهبې خپلواکي له منځه تللې او په دې هېواد کې د لږکیو مذهبي او مدني حقوق خوندي نه دي.
د امریکا متحده ایالتو د بهرنیو چارو وزیر انتونیو بلېنکېن ویلي، هر څوک حق لري، ازاد ژوند وکړي،خو په افغانستان کې د دین او مذهب په نوم د محدودیتونو له امله ښځې او نجونې له خپلو حقونو بې برخې شوي او د زده کړو مخه یې نیول شوې.
بلېنکین همداراز زیاته کړې،په دي وروستیو کې په مذهبې ځایونو او جوماتونو هم بریدونه زیات شوي،چې د مذهبي تاوتریخوالي د زیاتوالي لامل شوي دي.
هغه زیاتوي:«په افغانستان کې، د طالبانو په واکمنیدو سره د مذهبي ازادۍ شرایط په ډراماتیک ډول خراب شوي دی، په ځانګړې توګه ډېر وخت دوی د مذهب او دین تر بیرغ لاندې د ښځو او نجونو اساسي حقونه تر پښو لاندې کوي .په ورته مهال کې داعش د مذهبي لږکیو او په ځانګړې توګه د شیعه وګړو پر وړاندې په زیاتیدونکي ډول له تاوتریخوالي ډک بریدونه ترسره کوي.»
د افغانستان اسلامي امارت ویاند ذبیح الله مجاهد بیا د امریکا متحده ایالتو د بهرنیو چارو وزیر دغه څرګندونې بې بنسټه بولي او وایي،په افغانستان کې د ټولو اقلیتونو مذهبي او مدني حقونه په بشپړه توګه خوندي دي او هیڅ مذهبي تاوتریخوالی نه شته دی.
مجاهد زیاته کړې:« په افغانستان کې د ټولو اقلیتونو مذهبي او مدنې حقونه خوندي دي. په دې تړاو د امریکا متحده ایالتو د بهرنیو چارو وزارت راپور بشپړ نه دی او په ناسمو مالوماتو ولاړ دی. زموږ ټول اهل سنت، اهل تشیع، سیکهـ او اهل هنود هېوادوال په ازاد ډول خپلې مذهبي چارې ترسره کوي. موږ د امریکا متحده ایالتو د بهرنیو چارو وزارت راپور په بشپړ ډول رد وو.»
د امریکا په ګډون نړیوال بنسټونه داسې مهال په افغانستان کې د مذهبي او قومي لږکیو پر وړاندې د تاوتریخوالي خبره کوي،چې اسلامي امارت دا تورونه ردوي او وايي،افغانستان کې د شریعت په چوکاټ کې د هر وګړي مذهبي او مدني حقونه خوندي دي.
د لږکیو د حقونو دخوندیتوب ترڅنګ نړیوال دا هم غواړي،چې د افغانستان لږکیو ته په حکومت کې هم ونډه ورکړل شي، هغه څه چې دوی یې ټول شموله حکومت بولي.
