د افغانستان د درملیزو چوپړتیاوو ټولنه او د درملو تولیدي شرکتونه وایي، مارکیټ کې په کافي اندازه درمل لري او هغه اوازې بې اساسه دي،چې ګوندې افغانستان د درملو له کمښت سره مخ دی.
د افغانستان د درملو د تولید کارخونو مشر کمال الدین کاکړ وايي:« لارې نه دي تړل شوي،واردات کېږي. په کورونايي وخت کې ځمکنۍ او هوايي لارې ټولې تړلې وې، په هغه وخت کې هم درمل کم نه شول. نو اوس به څنګه کم شي؟ سمه ده،چې بيو کې بدلون راغلی دی، خو بیې په ټوله کې پر نړیواله کچه، نه یوازې په افغانستان کې، که هغه اسیا ده،که اروپا ده،که د امریکا مارکېټونه دي، هلته په ټوله کې د درملو خام مواد له ۴۷ تر ۵۷ سلنې پورې بیو بدلون کړی دی.»
د کاکړ په خبره د هیواد دننه د درملو د تولید په برخه کې ۲۵۰ میلونه ډالر پانګونه شوې او کورني شرکتونه دا مهال د ۱۵ سلنه درملو تولید ظرفیت لري.
د ده په خبره، که په داخلي درملو تکیه زیاته او د قاچاق مخه ونیول شي، کولای شيؤ له وارداتو پرته د اړتیا وړ درمل تولید کړي.
هغه زیاته کړه:« افغانستان په لویه کچه قاچاق راروان دی. کله چې دلته مسووولین د قاچاق مخه ونیسي، یا هم وغواړي، هغه کسان،چې واردات کوي، هویت د ډېریو مالوم نه دی. بې هویته خلک قاچاق کوي. خو کله،چې د هغوی مخه نیول کېږي، بیا مارکیټ کې غوغا راپورته کېږي. موږ له دې مسلې ملاتړ کوو. د قاچاق مخه دې ونیول شي. په قانوني ډول دې افغانستان ته واردات وشي. د کورني تولېد دې ملاتړ وشي، په مارکیټ کې به هېڅ نوعه کمښت راشي.»
افغانستان ته د درملو واردونکي شرکت مشر نجیب الله صاحب زاده بیا وایي، د وارداتو په برخه کې یو لړ ستونزې شته دی،خو په خبره یې د دوی واردات په عادي ډول روان دي.
صاحبزاده زیاتوي:« موږ اوس هم په پړاوونو کې ستونزې لرو. د درملو په لېږد کې ستونزې دي. د پیسو په لېږد کې ستونزې دي. د درملو کمښت وړاندې هم موجود نه وه او الحمد الله اوس هم نه شته دی. د سیمې پر کچه او په ځانګړې د افغانستان مارکېټ ډېر مجهز دی. ځکه دلته د خلاص مارکیټ په توګه د ډېرو هېوادونو توکي راځي. الحمد الله زموږ سوداګر ډېرې پراخه اړیکې لري.»
د افغانستان د درملو او روغتیايي متشبثینو خبرې داسې مهال کوي،چې له یوې میاشتې راهیسې کابل کې د درملو ځيني پلورونکي شکایتونه لري،چې مارکیټ د درملو له کمښت سره مخ دی.
