د پکتیا څمکنیو ولسوالۍ اړوند مندیخېلو سیمه کې د بسم الله په نوم د یوه ځایي هېوادوال کور نیمه شپه د پاکستاني پوځي رژیم د بمونو موخه ګرځېدلی او له امله یې د همدې کورنۍ د دوو غړیو په شمول، شاوخوا ۲۰ تنه هغه کسان هم شهیدان شوي چې د لومړني برید له کېدو وروسته، د مرستې او ژغورنې لپاره ورغلي وو.
ځایي امنیتي مسوولین وایي، دلته د دې هوایي بریدونو له امله شاوخوا ۲۰ ځای پرځای په شهادت رسېدلي او تر ۱۰۰ ډېر نور ژوبل دي.
د پکتیا امنیت آمر عبدالحلیم حیدر وايي:« دا چې تېره شپه د پاکستان پوځي رژیم د پکتیا ولایت څمکنیو ولسوالۍ د مندیخېلو په کلي کې پر یوه ملکي کور ظالمانه او وحشیانه بمبار کړی، ګڼ ملکي وګړي یې شهیدان او ژوبل کړي دي.»
د قرباني شوې کورنۍ غړی حاجي بادشاه خان وايي: « زموږ پر کور باندې بمبار کې زما یو ۱۴ کلن بچی شهید شوی، همدارنګه د کلي او قوم ۱۸ تنه شهیدان شوي، دا هغه کسان وو چې زموږ مرستې او ژغورنې ته راغلي وو.»
اخوا ځایي اوسېدونکي د پاکستان پوځي رژیم له لورې د افغانستان په خاوره کې د عامو افغانانو په نښه کول یو جنګي جنایت بولي. دوی له نړیوالې ټولنې او نړیوالو بنسټونو غواړي چې د ملکیانو پر مرګ چوپ پاتې نه شي.
د څمکنیو ولسوالۍ اوسېدونکی عبدالقیوم وايي: « د شپې ۱۲ بجې وې چې په دې کور بمبار وشو، موږ راغلو چې شهیدان او ټپیان له خاورو وباسو چې بیا ځل بمبار وشو او ډېر کسان یې شهیدان کړل.»
د سیمې اوسېدونکی ملک پټه خان وايي: « زموږ ګناه څه وه چې په نیمه شپه کې د پاکستان قاتل رژیم راباندې بمونه واچول؟»
د سیمې اوسېدونکی ځواني خان ونک وايي: « تاسو راشئ د دې شهیدانو کورونه، کلي او کورنۍ وګورئ، یوهم له وسله والو سره اړیکه نه لري بلکې ټول بزګران او کارګران دي.»
د پکتیا څمکنیو ولسوالۍ مندیخېلو سیمه کې د پاکستان پوځی رژیم له لوري د همدې مرګوني هوایي برید سره هممهاله، د پکتیکا ګیان ولسوالۍ کې هم په یوه هوايي برید کې شپږ عام وګړي شهیدان شوي دي.
د حکومت مرستیال ویاند پر خپله اېکسپاڼه لیکلي، د پکتیا، پکتیکا او کونړ ولایتونو په بېلابېلو سیمو کې د هوايي بریدونو له امله ټولټال ۳۶ ملکي وګړي چې ښځې او ماشومان هم په کې شامل دي، شهیدان شوي او ۱۶۳ نور ټپیان دي.
