د افغانستان اسلامي امارت د عامې روغتیا وزارت په هېواد کې د بېزو ټناکې (مانکي پاکس) ناروغۍ مثبتې پېښې ثبت کېدل ردوي او وايي، تر اوسه پورې د دې ناروغۍ مثبته پېښه ورسره نه ده ثبت شوې.
دیا وزارت ویاند جاوید هژیر وايي:« د بیرو تڼاکې (مانکي پاکس) پر ناروغۍ شکمنې پېښې چې په وروستیو کې په ځینو ولایتونو کې زموږ د هېوادوالو د اندېښنې لامل شوې وې، د روغتیايي کارکوونکو تر څېړنو او همدارنګه لومړنیو معایناتو وروسته دا جوته شوه چې په ځینو کې یې (انفېکټېټ سکبیس) او ځینو نورو کې بیا د (چېک ان پاکس) په ډول دي چې د درملنې وړ ناروغۍ دي او موږ یې اوسمهال امکانات هم لرو؛ نو له نېکه مرغه هېواد کې پر بیزو ټناکې ناروغۍ مثبته پېښه لا نه لرو.»
هژیر وايي،روغتیايي ټيمونه هغه شکمنې پيښې،چې خلک یې اندېښمن کړي،تر نظر لاندې نیولې دي او تر اوسه پورې د مانکيپاکس ناروغۍ کومه مثبته پيښه نه ده ثبت شوې.
هغه زیاتوي،چې په زابل او ننګرهار ولایتو کې د دغې ناروغۍ نښې موجودې دي،خو د مانکي پاکس یا د بیزو تڼاکې په نوم وایروسي ناروغي نه ده خپره شوې.
اخوا روغتیاپالان بیا دغه ناروغي خطرناکه ګڼي خو وايي، وژونکې نه ده او انسان ته له حیواناتو لیږدول کېږي.
روغتیاپال بشیر صمیم وايي:« په افغانستان کې خو تر اوسه پورې داسې یوه پېښه چې عامې روغتیا وزارت تائید کړي وي، نه ده ثبت شوې. خو په ننګرهار او زابل ولایتونو کې د مانکي پاکس یا د بېزو ټناکې ناروغۍ ته یې نښې نښانې ورته دي. خو تائید شوي نه دي. موږ چمتوالی لرو، کومه ستونزه نه شته دی. دا وژونکې ناروغۍ نه ده،لکه د کورونا وبا،چې موږ او تاسې ترې ډېر ووېرېږو.»
دمسوولینو په خبره، دا داسې ناروغي نه ده،چې وژونکي اوسي او د کورونا وبا پرتله يې د مړینې ګواښ کم دی.
