د ټولګټو وزارت مسوولین د جلال اباد – تورخم لویې لارې د دویم لین سړک قیر اچونې چارو د پیل خبر ورکوي او وايي، د دې مهمې پروژې په بشپړېدو سره به د هېواد ختیځ زون کې د ټرانسپورټي اسانتیاوو په برخه کې د پام وړ پرمختګ رامنځته شي.
د ټولګټو وزارت وياند محمد اشرف حق شناس وايي: « د جلال اباد – تورخم ۷۳ کیلومټره لویه لار د هېواد له مهمو او ټرانزیټي لارو څخه ده چې د افغانستان اسلامي امارت د ټولګټو وزارت له خوا یې د دویم لین سړک د پاتې برخو اساسي رغونې چارې د ۸۴۸ میلیونه افغانیو په لګښت، پيل شوې دي. د دې سړک د اسفالټ اچونې چارې عملا ً جریان لري.»
د مسوولینو په خبره، د جلال اباد- تورخم لویه لاره ۷۳ کیلومټره اوږدوالی لري چې د دویم لین سړک د پخولو چارې به یې د ۲۲ میاشتو په موده کې بشپړې شي.
دوی زیاتوي، د دې سړک جوړېدل به د بار وړونکو او مسافر لېږدونکو موټرو د تګ راتګ ستونزې کمې او د سیمې اقتصادي فعالیتونه به نور هم پیاوړي کړي.
محمد اشرف حق شناس زیاتوي: « ټاکل شوې یاده پروژه د ۲۲ میاشتو په اوږدو کې بشپړه او ګټه اخستنې ته وسپارل شي. د یادونې وړ ده چې د یادې پروژې رغنیزو چارو په بشپړېدو سره به هېوادوالو او سوداګرو ته د پام وړ اسانتیاوې رامنځته شي.»
بله خوا، د ننګرهار اوسېدونکي د دې سړک د قیر اچونې له پیل خوښي څرګندوي او وایي، د لارې خراب وضعیت له امله ګڼو ستونزو سره مخ دي.
د دوی په خبره، د سړک په بشپړېدو سره به د ټرافیکي پېښو کچه راټیټه او د سفر وخت به هم لنډ شي.
هغوی له اړوندو ادارو غواړي چې د پروژې چارې په ټاکلي وخت بشپړې کړي او د پخوا په څېر یې بیا ځل نیمګړې پرې نږدي، ترڅو خلک ژر تر ژره له دې مهمې پروژې ګټه پورته کړي.
د ننګرهار اوسېدونکى زيارمل وايي: « دا لاره چې تر تورخم پورې جوړېږي، موږ ډېر ورته خوښ یو . له دې سره به ټرافیکي پېښې کمې شي، ځکه پخوا یو طرفه سړک و او اوس به دوه لینه او خلکو ته اسانتیاوې رامنځته شي.»
د ننګرهار اوسېدونکی فضل خان وايي: « د جلال اباد – تورخم دویم لین سړک کارونه ډېر چټک روان دي. موږ له چارواکو غوښتنه کوو چې د دې سړک کار پای ته ورسوي او بیا یې نیمګړی پرې نږدي.»
د جلال اباد – تورخم لویه لار د افغانستان له مهمو سوداګریزو او ټرانزیټي لارو شمېرل کېږي چې هره ورځ پرې زرګونه مسافر او سلګونه بار وړونکي موټر تګ راتګ کوي.
د دې لارې دویم لین جوړېدل له کلونو راهیسې د خلکو غوښتنه وه؛ ځکه چې د ګڼه ګوڼې او خراب وضعیت له امله پرې ټرافیکي پېښې کېدې او د تګ راتګ ستونزې یې زیاتې وې.
د مسوولینو په وینا، د پروژې په بشپړېدو سره به د سیمې د ټرانسپورټ او سوداګرۍ په برخه کې مهم بدلونونه رامنځته شي.
