بلخ کې د امنیتي او ټرافیکي پېښو د مخنيوي په موخه، امنیتي پولیسو او ټرافیکو ته ۶۵ عصري موټرسایکلونه ووشل شول.
مسوولین وايي، د دې موټر سایکلونو له ترلاسه کولو سره به امنیتي ځواکونه او ټرافیک پولیس په اسانۍ سره د پېښو سیمې رسید ګي وکړي او د پېښو ترسره کېدو ګراف به را کم شي.
د بلخ امنیه قومندانۍ ویاند حافظ محمد عیسی وثیق وايي: « د بلخ ولایت امنیه قوماندانۍ ته د کورنیو چارو وزارت له خوا ۶۵ عرادې نوي موټرسایکلونه وکړل شوي چې نن ورځ د ټرافیکو مدیریت او ۱۲ امنیتي حوزو ته ووېشل شول. دغه موټرسایکلونه د دې لپاره وېشل شوي چې د پېښو پرمهال ژر رسېدنه وشي، د ټرافیکي پېښو مخنیوی وشي او ښاري نظم برابر شي. له دې وروسته به ۲۴ ساعته ګزمې کېږي او که امنیتي یا ټرافیکي پېښه کېږي، پر وخت به رسېدنه ورته وشي.»
د ټرافیک پولیسو مدیریت هم د موټرسایکلونو وېش په دې ښار کې د ټرافیکي او جنايي پېښو مخنیوي په برخه کې مهم بولي.
د بلخ امنیه قومندانۍ د ټرافیکو مدیر محمد عوض وثیق وايي: « د کورنیو چارو وزارت له خوا موږ ته ۱۵ عرادې موټرسایکلونه راکړل شوي او دا به د ښار د نظم تنظیمولو لپاره وکارول شي. په دې سره به د پېښو مخنیوی هم کېږي او پېښو ته به پر وخت رسېدنه هم وشي.»
مزار شریف ښاریان هم د دې اقدام هر کلی کوي او باور لري چې د موټر سایکلونو له وېش وروسته به د پېښو برخه کې شته اندېښنې راکمې شي.
د مزار شریف ښار اوسېدونکی محمدآصف وايي: « موټر سایکلونه ښه دي، د موټرو په پرتله د پېښې ځای ته ژر رسېږي. دا ډېر ښه کار وشو چې ټرافیکو ته یې موټرسایکلونه ورکړل.»
د مزارشریف اوسېدونکی جمشید وايي: « هرڅومره چې امنیتي او ټرافیک پولیسو په عصري وسایلو سمبال وي، د ښار امنیت او نظم ورسره ښه کېږي.»
بلخ کې پولیسو ته داسې مهال دا موټرسایکلونه وېشل شوي چې تر دې وړاندې په یو شمېر نورو ولایتونو کې هم د یادو شویو پېښو د مخنیوي لپاره همدا ډول موټرسایکلونه وېشل شوي دي.
که څه هم په ګڼ مېشتو سیمو او ښارونو کې دا ډول موټرسایکلونه ګټور تمامېږي، خو سپارښتنه کېږي چې د پېښو مخنیوی د قوانینو په رعایت کېدو سره کېدای شي.
د بلخ امنیه قومندانۍ د ټرافیکو مدیریت د معلوماتو له مخې، تېر کال شاوخوا٢٩٠ ټرافیکي پېښو کې ١٦٤ کسانو ژوند بایللی او ٢٤٥ نور ټپیان شوي دي.
