د پاکستان او افغانستان د سوداګرۍ ګډې خونې مرستیال یونس مومند د افغانستان لپاره د اقتصادي پراختیا او نړیوالې سوداګرۍ فډرالي ټولنې(BWA) استازی ټاکل شوی.
یونس مومند همدارنګه د دې نړیوالې اقتصادي شبکې د سنا غړیتوب هم ترلاسه کړی.
د نوموړي په خبره، هغه به له دې وروسته د افغانستان، جرمني او اروپا ترمنځ د سوداګریزو شرکتونو، ادارو او نورو اړوندو لورو ترمنځ د همکارۍ د پیاوړتیا لپاره هڅې کوي.
د پاکستان او افغانستان د سوداګرۍ ګډې خونې مرستیال یونس مومند وايي: « دا یوه نړیواله تجارتي شبکه ده او د ټولې نړۍ سوداګر په کې راټولېږي او مجلسونه کوي. تقریبا ً شپږ میاشتې مخکې د دې شبکې سنا ترلاسه شوې او له هغه وروسته د افغانستان لپاره د دې ټولنې نمایندګي ترلاسه شوه. اوس به موږ وکولی شو هغه ستونزې حل کړو چې اوس یې په تجارتي او اقتصادي برخو کې له اروپا سره لرو. د افغانستان د قوانینو او په ځانګړې توګه د ریاست الوزرا اقتصادي معاونیت د پالیسیو په رڼا کې به د سوداګرۍ وزارت تر نظر لاندې وکولی شو چې د افغانستان خصوصي سکټور له اروپا سره نښلوو.»
هغه فعالیتونه چې د اقتصادي اړیکو، سوداګرۍ، پانګونې او متقابل تفاهم د پراختیا لپاره ترسره کېږي.
د پاکستان او افغانستان د سوداګرۍ ګډې خونې مرستیال یونس مومند همدارنګه وایي چې له دې وروسته به د افغانستان او اروپایي هېوادونو ترمنځ د سوداګرۍ او اقتصادي اړیکو نوی فصل هم پرانستل شي.
د ده په خبره، له اقتصادي پراختیا او نړیوالې سوداګرۍ فډراالي ټولنېسره د هغه غړیتوب به وکړی شي چې د افغانستان او اروپایي ټولنې ترمنځ د سوداګرۍ چارې لا ګړندۍ شي.
یونس مومند زیاتوي، په افغانستان کې شته ثبات او امنیت ته په کتو هڅه کوي د اروپایي هېوادونو سوداګر وهڅوي چې راشي او په افغانستان کې پانګونه وکړي.
یونس مومند په دې اړه وايي: « اروپا زموږ معدني موادو، وچې او تازه مېوو ته اړتیا لري. لکه څرنګه چې پخوا موږ اروپا سره سوداګري کوله، اوس موږ کوشش کوو چې بېرته یې هماغه نارمل حالت ته راوګرځوو. دا مهال افغانستان کې د ډاډمن امنیت او فساد نه شتوالی سره موږ کولی شو اروپايي سوداګر وهڅوو چې افغانستان کې پانګونه وکړي.»
د اقتصادي پراختیا او نړیوالې سوداګرۍ فډراالي ټولنه د جرمني نړیواله اقتصادي شبکه ده چې نړیوالې اقتصادي او سوداګریزې اړېکې څاري او جوړوي یې.
د هغه په خبره، اروپایي هېوادونو سره به د افغانستان سوداګریزې اړیکې وغوړیږي او د دې هېوادونو سوداګر هم لېوالتیا لري چې د افغانستان پر خصوصي سکټور سربېره، په بېلابېلو برخو کې پانګونه وکړي.
