د افغانستان اسلامي امارت د یادې ناستې هرکلی کړی او خپله ژمنه يې تازه کړې،چې هېڅ هېواد ته به د افغانستان له لوري زیان ونه رسیږي.
د اسلامي امارت د ویاند مرستیال بلال کریمي وايي:« د نړیوالو دا حق دی،چې د افغانستان خاوره د چا پر ضد ونه کارول شي او دوی باید ډاډ ترلاسه کړي. اسلامي امارت د خپل دریځ او پالیسۍ له مخې، د نړۍ ټولو هېوادونو ته ډاډ ورکوي،چې د افغانستان خاوره به د کوم هېواد پر ضد نه کارول کېږي. نه به چاته اجازه ورکول کېږي،چې دوی ته کوم ګواښ متوجې شي.»
افغانانو ته د لومړنیو حقونو په نه ورکړې پر اسلامي امارت د نړیوالو نیوکه ده.
اسلامي امارت د ښځو او نجونو پر زده کړو او کار بندیز لګولی دی او په دې اړه لاهم کوم میکانیزم،چې دوی یې د جوړولو ژمنه ورکړې، تر اوسه پورې نه ده وروستۍ شوې.
د پوهنتون استاد فیض محمد ځلاند وايي، افغانستان باید نړۍ او سیمې ته دا هرڅه په ډاګه کړي،ترڅو له سیمه افغانستان سره همغږې شي.
هغه زیاته کړه:« تر ډېره پورې د افغانستان ستونزه کورني اړخونه هم لري. پر کوردننه هم باید ورته سیاستونه ونیول شي. طالب چارواکي باید له پاتې نورو افغانانو سره خپلې ستونزې او نور مسایل کم کړي او حل یې کړي.»
د تاجکستان په کوربتوب او مشرۍ د سیمې هېوادونو پر کچه دغه ناسته داسې مهال جوړیږي،چې یاد هېواد له تیرو لسو میاشتو راپدیخوا له افغانستان سره خپله پوله تړلې، کابل کې یې خپل سفارت تړلی او د افغانستان له خاورې د ترهګریزو ګواښونو وېره لري،خو اسلاميامارت د تاجکستان په ګډون ټولو ګاونډیانو ته ډاډ ورکړی دی،چې افغان خاوره به یې پرضد ونه کاریږي.
د افغانستان د ګاونډیانو او سیمې له هېوادونو دا غوښتنه کېږي،چې د اسلاميامارت حکومت پر رسمیت ومني او بیا د دې چانس ور نه کړي،چې دا هېواد په جګړو او تاوتریخوالي کې ورښکیل شي.
