د منځنۍ اسیا هېوادونو او د اروپايي ټولنې چارواکو د قزاقستان په الماتي ښار کې د افغانستان د وضعیت او د سیمې پر امنیت او د هغه د اغېزو او د نړیوالو همکاریو پراختیا پر لارو چارو خبرې کړې.
د قزاقستان بهرنیو چارو وزارت د معلوماتو له مخې، دا غونډه د افغانستان په اړه د اروپايي ټولنې او د منځنۍ اسیا هېوادونو د ځانګړو استازو او استول شویو استازو اتمه ناسته وه.
په غونډه کې ګډونوالو د افغانستان د روانو تحولاتو، د سیمې پر ثبات د هغو د اغېزو او د افغانستان د اقتصادي او ټولنیز پرمختګ د ملاتړ لپاره د نړیوالو همکاریو د راتلونکو فرصتونو په اړه نظرونه تبادله کړل.
د قزاقستان بهرنیو چارو وزارت ویلي: « د خبرو اترو پر مهال د څو اړخېزې ډېپلوماسۍ، بین السیمهییزې همکارۍ او خبرو اترو لپاره د نړیوال مرکز په توګه د الماتي مخ پر زیاتېدونکي رول ته هم اشاره وشوه. همدارنګه د امنیت، دوامداره پرمختګ او بشري همکاریو د مهمو مسایلو د حل لپاره د ګډو او همغږو لارو چارو د رامنځته کولو په برخه کې هم د الماتي پر اهمیت ټینګار وشو.»
د خبرو اترو یو مهم محور د افغانستان له لارې د ټرانزیټي او ټرانسپورټي دهلېزونو پراختیا وه. چارواکو ویلي چې د دغو لارو پراختیا کولی شي د منځنۍ او جنوبي اسیا ترمنځ سوداګریزې اړیکې پیاوړې کړي او له اروپا سره اقتصادي نښلونې لا زیاتې کړي.
د قزاقستان بهرنیو چارو وزارت ویلي، دا هېواد د سیمهییزو ننګونو د حل لپاره پر سیاسي او ډېپلوماټیکو لارو چارو ټینګار کوي او د سیمې د هېوادونو ترمنځ د همکارۍ او متقابل باور د پیاوړتیا ملاتړ دی.
د قزاقستان بهرنیو چارو وزارت په دې اړه ویلي: « په دې ناسته کې د افغانستان لپاره د نړیوال ملاتړ د همغږۍ په برخه کې هم د ملګرو ملتونو رول ته ځانګړې پاملرنه وشوه. ټولو ګډونوالو ټینګار وکړ چې په الماتي کې د منځنۍ اسیا او افغانستان لپاره د ملګرو ملتونو د دوامدار پرمختګ لپاره د یوه سیمهییز مرکز جوړېدل خورا مهم دي.»
په دې غونډه کې د افغانستان لپاره د نړیوالو مرستو د همغږۍ په برخه کې د ملګرو ملتونو پر رول هم ټینګار شوی. ګډونوالو په الماتي ښار کې د ملګرو ملتونو د دوامدار پرمختګ د موخو د سیمهییز مرکز فعالیتونه هم مهم بللي.
د غونډې ګډونوالو د افغانستان په اړه د نړیوالو خبرو اترو د دوام او له افغانانو سره د بشري او تعلیمي مرستو په برخه کې د قزاقستان د رول ستاینه کړې.
د سیاسي چارو شنونکی ادریس محمدي ځاځی وايي: « د اروپايي ټولنې هېوادونو او ورسره د منځنۍ اسیا هېوادونو لپاره اوس افغانستان سره د ګډ کار ترسره کولو په تړاو دل چسپي پیدا شوې. سیاستونه سره نږدې شوي، پر اقتصاد محوره پالیسیو کار کوي او په همدې تړاو کابل د مرکزي اسیا هېوادونو د سټراټیژیکو مطالعاتو مرکزونو د یوې ناستې کوربه دی.»
د سیاسي چارو شنونکی اسماعیل ځدراڼ وايي: « ګورئ دا هېوادونه غواړي چې له افغانستان سره ښې اړیکې وساتي، ځکه چې دوی ته د افغانستان ریښتینی انځور وړاندې شوی، دوی د افغانستان ستونزې درک کړې او په دې پوه شوي چې څه روان دي. اوس اړتیا ده چې هم په سیاسي او هم په اقتصادي برخه کې کار وشي. د افغانستان لپاره مهمه د دولت د رسمیت موضوع ده او باید په رسمیت یې وپېژني.»
د ناستې په پای کې استازو ټینګار وکړ چې د افغانستان د ثبات او دوامدار پرمختګ د ملاتړ لپاره به د منځنۍ اسیا هېوادونو، اروپايي ټولنې او د ملګرو ملتونو د ادارو ترمنځ همکارۍ دوام ومومي.
په دې غونډه کې د قزاقستان، قرغیزستان، تاجیکستان، ترکمنستان، اوزبېکستان، اروپايي ټولنې او ملګرو ملتونو استازو ګډون کړی و.
