« د شپې پاو کم ۱۲ بجې د پاکستان جېټ الوتکو په دې کور ناڅاپي برید وکړ. په برید کې یو ماشوم شهید شوی، مور، پلار، خوندي او وروڼه یې ژوبل شوي دي.»
دا په کونړ کې د پاکستان پوځي رژیم له خوا د شوي برید د یوه عیني شاهد خبرې دي. شېرخان زیاتوي چې په دې برید کې د ملکي وګړو کور په نښه شوی او په کنډواله بدل شوی.
د دې سیمې نور اوسېدونکي دا ډول بریدونه د ګاونډیتوب او نړیوالو قوانینو ښکاره سرغړونه بولي او د اسلامي امارت په شمول، له نړیوالو بنسټونو غواړي چې د دې ډول بریدونو مخنیوی وکړي.
دوی دغه راز د ملګرو ملتونو اړوند له نړیوالو سازمانونو هم غواړي چې د پاکستاني رژیم د دا ډول غیر موجه او ناځوانمردانه بریدونو څېړنه وکړي.
د کونړ شلتن ولسوالۍ اوسېدونکی شهامت خان وايي: « تاسو دا صحنه ګوری چې څومره وحشیانه او بې ملاحظې بریدونه یې کړي. موږ له ملګرو ملتونو غوښتنه کوو چې د پاکستان له واکمنانو پوښتنه وکړي. موږ د اسلامي امارت له مشرتابه او چارواکو هم غوښتنه کوو چې پر موږ د کېدونکو ظلمونو پوښتنه وکړي.»
د همدې ځای یو بل اوسېدونکی حیات الله وايي: « دا خو لومړی ځل نه دی بلکې له دې وړاندې یې هم ورته بریدونه کړي. باید پوښتنه او مخنیوی یې وشي.»
کونړ کې دا لومړی ځل نه دی چې د پاکستان پوځي رژيم دا ډول ړانده بریدونه ترسره کوي بلکې تر دې وړاندې يې هم په بېلا بېلو ولسوالیو او مرکز کې عامه تاسیسات او ملکي وګړي په نښه کړي دي.
د یادونې وړ ده چې څه موده وړاندې هم پاکستاني پوځي رژیم د کونړ سیدجمال الدین پوهنتون په نښه کړ او هلته په زده کړو بوختو محصلینو ته یې مرګ ژوبله واړوله.
