د کندهار له بېلابېلو ځایونو د ښوراندام سیمه کې د سبزیو او مېوو یوه مارکېټ ته هوږه راټولېږي او بیا تر بسته بندۍ وروسته، کورنیو او بهرنیو بازارونو ته وړاندې کېږي.
د کندهاري هوږې سوداګر وایي، په دې بریالي شوي چې تاجیکستان او قزاقستان هېوادونو ته ۷۰ ټنه هوږه صادره کړي.
دوی د هوږې ساتنې او د اړتیا له مخې بازار ته د وړاندې کولو پر چارو ټینګار کوي او وايي، اړتیا ده چې د هوږې ساتنې لپاره معیاري سړې خونې ورته جوړې شي.
د هوږې سوداګر نجیب الله وايي: « له هغه وخته چې سږ کال د هوږې حاصلاتو راټولول پيل شوي، دا شپږم موټر دی چې زه یې له هوږې باروم. ما ۴۶ ټنه هوږه یوه اوونۍ وړاندې هم انتقال کړې وه. تاجیکستان او قزاقستان ته زما صادره کړې هوږه ټولټال ۷۰ ټنه کېږي.»
د هوږې سوداګر محمد صادق وايي: « په ټوله کې د افغانستان هوږه او بیا د لوی کندهار هوږه ښه کیفیت، رنګ او خوند لري. که چېرې بهرنیو هېوادونو ته زموږ د هوږې صادرولو لپاره شرایط برابر شي، دا به لویه ګټه وکړي.»
د هوږې سوداګر نثار احمد وايي: « زه له حکومت غوښتنه کوم چې موږ ته د وېزو اخستلو اسانتیاوې برابرې کړي، ترڅو د خپلو محصولاتو لپاره بازار موندنه وکړو.»
د کندهار سوداګرۍ او پانګونې خونې مسوولین که څه هم د هوږې کیفیت په کور دننه او بهر د هرکلي وړ بللی، خو زیاتوي چې له پاکستان سره د لارو تړل کېدو او د نورو هېوادونو اوږدو لارو يې پر صادراتو اغېز کړی.
د کندهار سوداګرۍ او پانګونې خوني مرستیال انجینر عبدالباقي بینا وايي: « د کندهار هوږه په طبیعي ډول کرل کېږي او ډېر ښه کیفیت لري. موږ په تېر کې چې لارې خلاصې وې، د هوږې ښه صادرات لرل، خو اوس چې د پاکستان لارې بندې دي، زموږ هوږه اوزبېکستان ته ځي او بیا له هغه ځایه نورو هېوادونو ته صادرېږي؛ ځکه یې لګښتونه لوړ شوي، نو له همدې امله سږ کال زموږ صادرات کم دي.»
په همدې حال کې د کندهار کرنې ریاست مسوولین وایي، سږکال کندهار کې پر ۹۶۰ هکټاره ځمکو هوږه کرل شوې چې د اټکل له مخې به ترې ۶ زره ۵۸۰ ټنه حاصلات ترلاسه شي.
مسوولین ډاډ ورکوي چې د هوږې په شمول يې کورنیو سبزیجاتو ته په بهر کې د بازار موندنې هڅې پيل کړې دي.
د کندهار کرنې ریاست ویاند محمد حنیف حقمل وايي: « کندهار کې په ۹۴۰ هکټاره ځمکو هوږه کرل شوې چې د اټکل له مخې به ترې ۶ زره ۵۸۰ ټنه هوږه ترلاسه شي. د ځمکو دا شمېرې د تېر کال په پرتله زیاتوالی ښيي. ښه خبره دا ده چې موږ په دې برخه کې نباتي ناروغۍ او آفتونه نه لرو، حاصلات په ښه حالت کې دي او تمه لرو چې ګڼو نورو هېوادونو ته یې هم صادره کړو.»
یاده دې وي چې کندهار کې د هوږې کروندګر ډاډ ورکوي چې که د هوږې د ساتنې او صادراتو لپاره اسانتیاوې ډېرې شي، د کندهار کرنیز محصولات به نړیوالو بازارونو کې د ځان لپاره لا ښه ځای ومومي.
