د بهرنیو چارو وزیر په افغانستان کې د یوناما له سرپرستې سره ليدنه کې د افغانستان په اړه د ملګرو ملتونو امنیت شورا راتلونکې ناستې او نورو اړوندو موضوعاتو په اړه خبرې کړې.
اميرخان متقي په ملګرو ملتونو او نورو نړیوالو سازمانونو کې د اسلامي امارت استازو حضور د دواړو لورو ترمنځ د تعامل د پیاوړتیا لپاره مهم بللی او زیاته یې کړې ده چې په يادو سازمانونو کې د افغانستان استازولي د حکومت مسوولیت او د افغان ولس حق دی.
د بهرنیو چارو وزارت مرستیال ویاند ضیا احمد تکل د دې لیدنې په اړه وايي: « په دې لیدنه کې د افغانستان په اړه د ملګرو ملتونو امنيت شورا راتلونکې ناستې او نورو اړوندو موضوعاتو په اړه خبرې وشوې. د هېواد د بهرنیو چارو وزیر په ملګرو ملتونو سازمان او نورو سازمانونو کې د افغانستان د استازيو حضور د دواړو لوريو ترمنځ د تعامل لا پياوړتيا او پراختيا سره مرستندوی وباله او زياته يې کړه چې د افغانستان استازولي د افغان حکومت مسووليت او د افغان ولس حق دی.»
بله خوا، کابل کې د يوناما سرپرستې له افغانستان سره د نړیوالې ټولنې د تعامل پر پراخېدو او په بېلابېلو برخو کې د همکاریو پر دوام ټینګار کړی دی.
ضیا احمد تکل په دې اړه وايي: « آغلې جورجټ ګانیون هم په خپل وار له افغانستان سره د نړیوالې ټولنې د لازیات تعامل او په بېلابېلو برخو کې پر همکارۍ ټینګار وکړ. د ناستې په پای کې دواړو لوریو په بشري برخو کې د همکاریو پر پراختیا او د متقابل تعامل پر لا پیاوړتیا د ګډو کاري کمېټو پر همغږۍ ټينګار وکړ.»
شنونکي بيا وایي، یوناما دې د افغانستان وضعیت په واقعي توګه درک او د افغانستان او نړیوالې ټولنې ترمنځ دې د اړیکو په ښه کېدو کې مرسته وکړي. د دوی په خبره، اسلامي امارت دې هم د نړیوالې ټولنې مشروع غوښتنې ومني، ترڅو له نړۍ سره تعامل اسانه شي.
د سیاسي چارو شنونکی اختر محمد راسخ وایي: « یوناما د خپل فعالیت په لړ کې داسې ګامونه نه دي پورته کړي چې له مخې یې د افغانستان ستونزې حل شي.»
د متقي او ګانیون لیدنه داسې مهال ده چې له تېرو څه باندې څلور نیمو کلونو راهیسې ملګرو ملتونو د خپل باور په اساس، د اسلامي امارت او نړۍ ترمنځ د تعامل پر وړاندې اصلي خنډونه د ښځو پر زدهکړو او کار محدوديت، د ټولګډونه حکومت نه شتوالی، بشري حقونه ناسم وضعيت او د ډاډمن امنیت په اړه د نړیوالې ټولنې اندېښنې بللي.
اسلامي امارت دا څه له تېرو څه باندې څلور نیمو کلونو راهیسې د افغانستان کورني مسایل بللي.
