کندهار صنعتي پارک کې د لومړي ځل لپاره د خصوصي سکټور اړوند یو شمېر صنعکارانو لپاره د بازار موندنې او مارکېټېنګ برخه کې روزنیز ورکشاپ جوړ شو.
دا ورکشاپ د کندهار صنعت او معدن خوني او د کندهار زراعتي پوهنتون«انستو» له خوا جوړ شو چې په کې د لومړي ځل لپاره ۲۵ تنو صنعتکارانو ته روزنه ورکول کېږي.
د کندهار صنعت او معدن خوني مسوولین وايي، هڅې يې پیل کړې دي چې یاد ولایت کې شته صنعتکاران او پانګوال په علمي توګه د بازار موندنې او مارکېټېنګ په برخه کې وروزي، ترڅو بازار کې له شته فرصتونو په پوره توګه ګټه پورته کړي.
د کندهار د صنعت او معدن خونې رییس سید سرور اماني وايي: « دا چې مارکېټېنګ څنګه کېږي، د توکو بسته بندې څنګه کېږي او دا چې روابط څنګه ساتل کېږي؛ د دې لپاره موږ لازمه وګڼله چې د کندهار پوهنتون د کرنې پوهنځي له استادانو څخه ګټه واخلو او دا دورځنی ورکشاپ پیل کړو. په دې ورکشاپ کې د خامو موادو راټولو څخه نیولې تر بسته بندۍ او بازار موندنې پورې، مسایل ورښودل کېږي.»
د کندهار پوهنتون د اقتصاد پوهنځي استاد عبدالرزاق ریحان وايي: « موږ د کندهار صنعتکارانو ته د بازار موندنې په تړاو دوه ورځنی ورکشاپ چمتو کړ، ترڅو صنعتکاران د خپلو محصولاتو په اړه پوهاوی ترلاسه کړي او په بازار کې مشتریان له لاسه ورنه کړي.»
په ورته مهال، د کندهار پانکوال د دې ډول ورکشاپونو جوړېدل د صنعت د ودې لپاره اړین بولي او غوښتنه کوي چې راتلونکي کې د صنعتکارانو لپاره نورو برخو کې هم روزنیز پروګرامونه جوړ شي، ترڅو پر کورني او بهرني بازارونو باندي بر لاسي شي.
هغوی زیاتوي چې زیات شمېر فابریکه لرونکي او صنعتکاران اوسمهال د بازار موندنې برخې سره نااشنا دي او غواړي چې دا ډول پروګرامونه تر ټولو پانکوالو پورې ورسېږي.
صنعتکار بیشر احمد شهزاده وايي: « موږ وايي چې په صنعت کې علم د روح په مانا دی او هغه مهال وده کولی شي چې د دې ډول پوهو کسانو نظرونه په کې ځای پرځای شي. دا ورکشاپ موږ ته ډېر ګټور تمام شو او توقع لرم چې دا ډول ورکشاپونه نورو صنعتکارانو ته هم جوړ شي.»
صنعتکار محمود شاه سعید وايي: « موږ له دې وړاندې هم غوښتنه کړې وه چې دا ډول ورکشاپونه باید جوړ شي، موږ ته د بازار موندلو هنر را وښودل شي او نویو بازارانو ته داخل شو. »
د یادونې وړ ده چې تردې وړاندي کندهار کې یو شمېر پانګوالو او صنعت کارانو په کورني او بهرني مارکېټ کې د فرصتونو نه شتوالي او بازارموندنې برخه کې د مسلکي کسانو د نشت خبره کوله چې د مسوولینو په وینا، تر راتلونکو کلونو پوري به یې یادې ستونزې ټولې حل شي.
