بهرنیو چارو وزیر مولوي امیرخان متقي د افغانستان لپاره د چین له ځانګړي استازي یو شیاویونګ سره په لیدنه کې د دواړو هېوادونو د اړیکو پر لا پیاوړتیا، سیمه ییز امنیت او د افغانستان او پاکستان ترمنځ د ارومچي مذاکراتو د بهیر پر پرمختګ خبرې کړې.
په دې لیدنه کې ټینګار شوی چې په ارومچي کې د افغانستان او پاکستان ترمنځ د ترسره شویو مذاکراتو راتلونکی پړاو باید روښانه، عملي او پایله یې د محوري اجنډا پر بنسټ پر مخ لاړه شي.
لیدنه کې متقي ويلي، سیمه ییز ثبات، متوازنې اړيکې، اقتصادي همکاري او د متقابل درناوي پر بنسټ اړیکې د افغانستان بهرني سیاست اساسي محور جوړوي.
د بهرنیو چارو وزارت مرستيال ویاند ضیا احمد تکل وايي: « د بهرنیو چارو وزیر څرګنده کړه چې د سیمې ثبات، توازن، اقتصادي همکاري او د متقابل درناوي پر بنسټ اړیکې د افغانستان د بهرني سیاست اساسي محورونه جوړوي. نوموړي ټینګار وکړ چې د خبرو د بهیر بریالیتوب د واقعي اقداماتو، د باور فضا د پیاوړتیا، او د کړکېچ د کچې د ټیټ ساتلو پورې تړلی دی او اسلامي امارت په همدې برخو کي د پام وړ ګامونه اخستي.»
د بهرنیو چارو وزیر په دې لیدنه کې زیاته کړې، د مذاکراتو بریا له عملي اقداماتو، د باور فضا له پیاوړتیا او د کړکېچ کچې له ټیټ ساتلو سره تړاو لري او اسلامي امارت په دې برخو کې مهم ګامونه پورته کړي.
په ورته مهال، د چین ځانګړي استازي هم د ارومچي مذاکراتو پر دوام او اغېزمنتیا ټینګار کړی او دا یې د سیمهییز ثبات او همغږۍ لپاره مهم چوکاټ بللی.
ضیا احمد تکل په دې اړه وايي: « د چین ځانګړي استازي د ارومچي د خبرو د بهیر پر دوام او اغېزمنتیا ټینګار وکړ او دا یې د سیمهییز ثبات او همغږۍ لپاره یو مهم چوکاټ وباله. نوموړي څرګنده کړه چې د دې بهیر راتلونکی پړاو باید له روښانه تمرکز سره عملي پایلو ته زمینه برابره کړي او په همدې موخه یې د جدي تعامل، اعتماد جوړونې او تفاهم پر اهمیت ټینګار وکړ. »
بله خوا، د پاکستان بهرنيو چارو وزارت د دوشنبې په ورځ په اسلاماباد کې د افغانستان سفیر احضار کړی و او په بنو کې يې د پوليسو پر پوستې د موټر بم چاودنې په اړه ورته اعتراض لیک سپارلی.
اسلامي امارت په دې چاودنه کې لاس لرل په کلکه ردوي.
د اسلامي امارت ویاند ذبيحالله مجاهد په دې اړه وايي: « اسلامي امارت د پاکستاني چارواکو وروستۍ څرګندونې چې بنو کې د پولیسو پر مرکز برید افغانستان کې پلان شوی بللی، بې اساسه ګڼي او ردوي یې. د افغانستان اسلامي امارت د ستونزو حل د تورونو، ګواښونو او احساساتي دریځونو پر ځای د تفاهم، متقابل احترام او واقعي همکاریو له لارې ممکن ګڼي. اسلامي امارت یو ځل بیا خپل دریځ روښانوي چې د افغانستان خاوره د هېڅ هېواد پر ضد نه کارول کېږي او نه به چا ته د داسې تحرکاتو اجازه ورکړل شي چې د سیمې امنیت او ثبات زیانمن کړي.»
شنونکي وایي، د کابل او اسلام اباد اړیکو په عادې کېدو کې د چین رول مهم دی او ټینګار کوي چې پاکستان باید د زور کارولو په ځای، تفاهم ته د لارې خلاصولو لپاره د افغانستان پر وړاندې خپل سیاستونه مثبت لور ته بدل کړي.
د سیاسي چارو شنونکی روحالله هوتک وايي: « پاکستان باید خپلې پالیسۍ ورغوي او د خپل اقتصادي حالت او سیمه ییز ثبات رامنځته کولو لپاره همکاري وکړي؛ که داسې ونه کړي، لویې ستونزې رامنځته کېږي او دا ستونزې د سیمې او په ځانګړې توګه د چین ګټې ننګولی شي.»
د کابل او اسلاماباد ترمنځ د سعودي عربستان، ترکيې، قطر او چين په کوربهتوب په تېر کې څو پړاوه مذاکرات ترسره شول، هغه چې اسلامي امارت يې د بې پايلې کېدو لامل د پاکستان له لوري پر غير عملي غوښتنو ټينګار يادوي.
