اسلامي امارت یو ځل بیا د پاکستاني چارواکو هغه ادعاوې رد او بې بنسټه وبللې چې وايي، د افغانستان له خاورې نور هېوادونه له خطر سره مخ دي.
د پاکستان دفاعي ځواکونو مشر عاصم منیر د يکشنبې په ورځ ادعا وکړه چې د افغانستان له خاورې نورو هېوادونه له خطر سره مخ دي او په خبره يې، اسلامي امارت باید د نورو هېوادونو په ضد د افغانستان خاورې کارېدو مخنيوی وکړي.
خو د اسلامي امارت ویاند تاز د نوموړي څرګندونې رد کړې او وايي، اسلامي امارت هېچا ته اجازه نه ورکوي چې د افغانستان له خاورې د کوم بل هېواد پر ضد ګټه واخلي.
د اسلامي امارت ویاند ذبیحالله مجاهد وايي: « دا روښانه خبره ده چې د افغانستان خاوره د نورو هېوادونو په ضد نه کارول کېږي او اسلامي امارت په دې اړه ډېر جدي دریځ لري. دغه کار د افغانستان د سټراټيژۍ یوه برخه او ملي ګټې دي او موږ هېڅکله اجازه نه ورکوو چې د افغانستان خاوره د پاکستان په ګډون د کوم بل هېواد په ضد وکارول شي. پاکستان باید په خپله خاوره کې د نا امنیو مخنیوی خپله وکړي نه دا چې پر افغانستان تور پورې کړي.»
مجاهد له پاکستان غوښتنه کړې چې د ورته ادعاوو په ځای دې خپله انرژي د کورني امنیت پر ښهوالي مصرف کړي او له شواهدو پرته دې د کابل له تورنولو لاس واخلي.
د چارو څارونکي بیا وایي، پاکستان هڅه کوي په لوی لاس د خپلو امنيتي ناکامیو پړه پر افغانستان ور واچوي.
د سیاسي چارو شنونکی اسماعیل ځدراڼ وايي: « پاکستان افغانستان کې جوړ دولت نه غواړي. یوازې اسلامي امارت سره نه بلکې د افغانستان له هر نظام سره یې ورانه ده. دوی خامخا تورونه لګوي.»
ځينې نور څارونکي بیا وایي، پاکستان پر امنيتي ننګونو سربېره په دې وروستیو کې له ګڼو نورو کورنیو او اقتصادي ستونزو سره هم مخ دی او ترې د عامو پاکستانيانو د پام اړولو لپاره پر افغانستان بې اساسه تورونه لګوي.
د پوهنتون استاد فیض محمد ځلاند وايي: « د پاکستان حکومت غواړي په دې سره خپلې اوږې سپکې کړي او په خلکو دا ومني چې د پاکستان د نا امنیو دلایل په افغانستان کې دي. دوی غواړي له دې مسئلې ناوړه سیاسي ګټه پورته کړي.»
د پاکستان دفاعي ځواکونو مشر داسې مهال له افغانستانه نورو هېوادونو ته د خطر شته والي ادعا کوي چې پاکستان په افغانستان، خيبرپښتونخوا او بلوچستان کې د ترهګرۍ په ضد د عملياتو په پلمه، د ملکيانو هدف ګرځولو له امله له نړيوال فشار سره مخ دی.
ملګرو ملتونو منلې چې د پاکستان پوځ له لوري د ملکي افغانانو په نښه کولو وروستۍ پېښې يې مستند کړې دي.
