پکتیا کې د اوبو پر ژرندو  اوس هم خلک غنم او جوار اوړه کوي 

په سویل پکتیا ولایت کې د اوبو ژرندې  لسګونه کلونه مخېنه لري او اوس هم یو شمیر سیمو کې فعالې دي او خلک پرې غنم او جوار اوړه کوي. 

د یاد ولایت اوسېدونکي وايي، د اوبو پر ژرندې د غنمو  او جوارو اوړه  د ماشین شویو پرتله خوندور دي.

زر محمد خان پکتیا کې د اوبو ژرنده لري او وایي، له پلار او نیکه ورته په میراث پاتې ده او تر اوسه پورې  یې فعاله ساتلې ده. 

زرمحمد خان زیاتوي:«  دا ژرنده موږ ته له پلار او نیکه په میراث پاتې ده. زما عمر ۶۴ کاله دی. زما په یاد خو دا ژرندې موجودې وې. دا په تاریخي اثارو کې راځي او زموږ د پلار او نیکه اثار دي.»

زرمحمد خان د ژرندې د جوړښت په اړه وایي، د ډبرې دوه پلونه لري،چې یو یې د اوبو د فشار په وسیله تاویږي او غنم او جوار اوړه کوي. 

هغه زیاته کړه:« یوه ډبره یې لاندې ده، بله پاس ده.  پاس ډبره حرکت کوي،د څرخ په وسیله سره دا پله کې موږ داسې یوه جرۍ ورته جوړه کړې ده، هغې ته  څترۍ وایو، کله چې څرخ تاویږي، پل ورسره ګرځي.» 

معمولا ژرنده د یوه کاریګر له لوري ګرځول کیږي،چې ژرنده ګر یې بولي او له اوړه  شویو اوړو او جوارو ټاکل شوې اندازه مزد اخلي. 

د پکتیا یو تن اوسېدونکی اډي ګل  وايي:« موږ چې چاته غنم او جوار اوړه  کړو، شپږمه برخه زموږ په کې ده. څلور برخې د ژرندې څښتن دي،پنځمه د ترکاڼ ده ، چې ژرنده جوړوي او شپږمه برخه زما ده. زموږ داسې حساب دی.» 

زرمحمد خان د ژرندې تر څنګ د اوبو له دغه ویالې د برښنا سیستم هم فعاله کړی دی، چې دوه کیلو واټه برښنا تولیدي او ۳۰ کورنۍ ترې برخمنې دي.