له تیرو اتو میاشتو راهیسې له نوي نظام همدا تمه ده،چې د افغانستان د کورنیو او بهرنیو ستونزو د حل لپاره باید لویه جرګه راوبلل شي،خو لاهم په دې تړاو اسلامي امارت کوم څرګند دریځ نه دی غوره کړی .
په دې وروستیو کې اسلامي امارت پتیلې،چې لویې جرګې ته ورته د علماوو یوه ستره غونډه جوړه کړي،چې په اړوندو مسایلو به په کې بحث او خبرې وشي.
خو د دوی ټینګار دادی،چې په دې شورا کې باید د هېواد ټولو برخو استازو برخه ورکړل شي،ترڅو وشي کولی،د ستونزو لپاره حل لار پیدا کړي.
د سیاسي چارو کارپوه مختار هاتف وايي:« دا چې اسلامي امارت غواړی،چې د علماوو سراسري شورا وغواړي او دافغانستان مشروعیت ترې حاصل کړي. دا یو غوره کار دی، خو تر دې غوره کار دا دی،چې داسې یوه ستره اسلامي شورا دې وي،چې په هغه کې د ټولو قومونو استازو مخالفینو او سیاسي ګوندونواو قومي مشرانو او د ټولو افغانانو استازي په کې ګډون ولري. نو بیا کولای شي،چې د افغانستان ستونزو ته د حل لار پیدا کړي.»
ځینې نور بیا وايي، د داسې غونډو جوړل به هغه مهال اغیزمن وي،چې اجنډا یې تعریف شي او تشکیل یې هم مالوم،چې د اسلامي امارت له مشرانو پرته څوک ورته رابلل کیږي.
د سیاسي چارو کارپوه طارق فرهادي وايي:« د علماو عالي شورا اغیزمنتیا د دې شورا تشکیل تعریف او اجنډا پورې تړلې ده، په حقیقت کې په ځینو علماوو نه حسابیږي او له هېواده بهر تللي دي او اوس پوښتنه داده،چې په داسې یوه شورا کې کوم علما ونډه اخلي.»
کارپوهان په دې باور دي،چې د افغانستان نړیوال مشروعیت له کورني مشروعیت پورې تړلی دی او که اوسنی نظام ونه توانیږي،چې د علماوو شورا او یا هم د کومې بلې سترې ناستې له لارې دغه مشروعیت ترلاسه کړي،نو سیمه اونړۍ به هم پرې باور وکړي او له کابل سره به سیاسي اړیکو ټینګښت ته زړه ښه نه کړي.
