Skip to content
د ملګرو ملتونو عمومي منشي انټونیو ګوترس روسیې ته د خپل سفر پر مهال د افغانستان پر روان اقتصادي وضعیت ژوره اندېښنه ښودلې او له نړيوالې ټولنې یې غوښتي دي،چې افغانستان ته د پیسو تزریق لپاره دې شرایط وټاکي.
ګوترس چې د روسیې د بهرنیو چارو وزیر سرګي لاوروف سره ګډ خبري کنفرانس ته خبرې کولې ویلي، افغانستان کې د نغدو پیسو نشتون ستونزه خورا جدي ده او پر وینا یې چې دوی یاده ستونزه په الوتکو کې د ډالرو په استولو سره تر یوه بریده حل کړې.
ګوترس زیاتوي:« د نغدو پیسو په نشتون کې به د افغانستان اقتصادي نظام راوپرځیږي،چې تباه کوونکې اغیزې به یې پر عامو خلکو وي. موږ پر نړیوالې ټولنې غږ کوو،چې د نغدو پیسو د تزریق لپاره دې شرایط وټاکي،هغه چاره چې موږ ترسره کړې ده. موږ افغانستان ته تر دې دمه ۵۰۰ میلیونه ډالر د الوتکو په مرسته استولي دي.»
کوترس ویلي،د افغانستان مرکزي بانک او د امریکا متحده ایالتو خزانې وزارت سره پر ګډه کار کوي، تر څو د کنګل شویو پیسو خنډونه له منځه یوړل شي.
ګوترس همداراز ویلي، دوی نه یوازې د افغانستان خلکو لپاره کار کوي،بلکې له طالبانو سره هم پر ګڼو مسایلو په خبرو بوخت دي.
هغه زیاته کړې:« موږ له طالبانو سره پر بېلابېلو مسایلو جدي بحثونه لرو،چې په هغه کې د ټولشموله حکومت جوړل دي، داسې چې نه یوازې ښځې په کې ونډه ولري، بلکې تاجکان، ازبکان او هزاره هم په کې شامل وي. موږ له طالبانو سره د ترهګری ضد برخه کې هم جدي خبرې کړي دي، ترڅو افغانستان بیا د ترهګرو ځاله نه شي.»
له انتونیو ګوتیرس سربېره د روسیې بهرنیو چارو وزیر سرګي لاوروف هم ویلي،که طالبان ټولشموله حکومت جوړ کړي، دوی به یې په رسمیت وپیژني.
لاوروف ویلي، په اوس کې له طالبانو سره د اقتصادي او سیاسي اړیکو د پاللو په موخه د دواړو سفارتونو له لارې په اړیکه کې دي.
هغه زیاته کړه:« د دې لپاره چې موږ د افغانستا نویو واکمنانو د رسمیت پیژندنې برخه کې پرمختګ وکړو، اړتیا ده،چې طالبان پر خپلو ژمنو عمل وکړي او ټول شموله حکومت جوړ کړي،چې په هغه کې نه یوازې قومي بلکې مذهبي ټول شمولیت هم ولیدل شي. موږ کابل کې له پخواني ولسمشر حامد کرزي او عبدالله عبدالله سره هم په اړیکو کې یو او هغوی له طالبانو سره مذاکراتو لپاره لیواله دي.»
لاوروف ویلي، په افغانستان کې د شوروي حضور پر مهال ۱۴۰ لویې او وړې کارخونې جوړې شوې وې،چې د افغانستان اقتصاد د ملا تیر یې تشکیلاوه،خو ناټو د شل کلن حضور سره یوه دا ډول کارخونه هم جوړ نه کړه. انټونیو ګوترس له طالبانو سره په تعامل کې دوه مهم ټکي د نجونو د منځنیو ښوونځیو پریکړه یاده کړې،چې باید له سره واخیستل شي او ټولې نجونې ښوونځیو ته ولاړې شي.
هغه ویلي، ښځو ته د کار اجازه ورکول بل هغه ټکی دی،چې دوی ته خورا اهمیت لري.
