په هرات کې د ایراني او افغان پوله ساتو ځواکونو ترمنځ د پولې پرسر له شخړې وروسته ایران په سرحدي سیمه اضافي ځواکونه ځای پرځای کړي او زغروال ټانکونه او درنې وسلې یې هم ګډې پولې ته رانږدې کړي دي.
د پوځي چارو شنونکي په دې باور دي،چې دغه هېواد د افغان او ایراني سرحدي ځواکونو ترمنځ وروستیو جنجالونو او د ناقانونه افغان کډوالو وراوښتو اندیښمن کړی دی او په همدې موخه یې د پولې امنیت کلکل کړی دی.
د پوځي چارو شنونکی صادق شینواری وايي:« ایران له افغانستان په درېیو برخو کې اندیښنه لري، د داعش جنګیالیوپه تړاو،د غیرقانوني افغان کډوالو په تړاو او د افغان او ایراني پوله ساتو ځواکونو ترمنځ د وروستۍ نښتې له امله اندیښنه لري. طالبان باید ایران ته د نه خطر هر راز ډاډ ورکړي.»
خو اسلامي امارت ټینګار کوي،چې چاته اجازه نه ورکوي،ترڅو د افغانستان خاوره د ګاونډیو او یاهم د بل هېواد پرضد وکاروي.
د پوځي چارو شنونکي وايي، ایران هم د نورو ګاونډیو په څېر له افغانستان سره زړه دښمني پالي او اوس په دې پلمه،چې له سرحده ساتنه کوي، افغان لوري ته خپل نظامي زور ښودنه کوي.
د پوځي د چارو شنونکی سرور نیازی وايي:« اصلي خبره داده،چې اوس ایران غواړي،په دې بهانه باندې چې موږ د خپلو پولو امنیت نیسو او بار بار یې خپلې پوستې د افغانستان خاورې ته راوړاندې کړې او اوس غواړي،چې قدرت نمايي وکړي،چې موږ منظم پوځ لرو او موږ کولای شو،چې په افغانستان کې هغه څه ترسره کړو،چې زړه موغواړي.»
د پوځي چارو شنونکی صادق شینواری وايي، یوه اندیښنه داهم ده،چې ایران غواړي،هغه پخواني افغان سیاسیون،چې د جمهوریت له سقوط سره دغه هېواد ته ورغلي،د خپلو ګټو او اهدافو لپاره یې وکاروي.
شینواري زیاته کړه:« هغه پخواني سیاسیون،چې اوس ایران ته کډوال شوي دي،کیدای شي ایران له دوی نه د افغانستان د ناامنیه کیدو لپاره په راتلونکي کې د طالبانو پرضد ترې ګټه واخلي.»
څو ورځې وړاندې د افغانستان سرحدي ځواکونو او ایراني پوله ساتو ترمنځ اسلام کلا سرحد کې هغه مهال نښتنه رامنځته شوه،چې افغان لوري یاده سیمه کې د سړک جوړولو کار پيل کړ،خو په دغه نښته کې یو لوري ته هم مرګ ژوبله نه ده اوښتې.
ایران او پاکستان هغه ګاونډیان،چې د افغانستان په کورنیو چارو کې یې تل لاسوهنه کړې او په دې وروستیو کې یې د افغانانو پر وړاندې تاوتریخوالي ته دوام ورکړی دی.
د پاکستان الوتکو په ښکاره پر افغان خاوره تیری وکړ او لسګونه ښځو او ماشومانو ته یې مرګ ژوبله واړوله،خو ایران بیا په خپله خاوره کې سلګونه کډوال شکنجه او په زندانونو ته واچول.
