د سمنګان کرنې ریاست چارواکي وایي، پر کروندو د ملخانو برید په ضد یې دا کمپاین د ایبک ښار اړوندو سیمو او حضرت سلطان ولسوالۍ کې پيل کړی دی.
د ملخانو ضد دا کمپاین داسې مهال پیل شوی چې د دې ولایت په ځینو سیمو کې پر فصلونو د ملخانو برید لا د مخه پیل شوی دی.
د چارواکو په وینا، د یادو ملخانو د برید مخنیوي لپاره پیل شوی کمپاین به دوه میاشتې دوام کوي او په کې به پر شاوخوا اووه زره جریبه کرنیزو ځمکو او څړځایونو درمل وپاشل شي.
د سمنگان کرنې ریاست د نباتاتو ساتنې عمومي مدیر ګلابالدین غیاثي وايي: « موږ تر خپلې وسې هڅه کوو چې کرنیزې ځمکې له ملخانو وساتو، که چېرې همکاري ونه شي او دغه آفت مهار نه شي، د سږ کال فصلونه به سخت زیانمن کړي. له نېکه مرغه موږ سږ کال کافي اندازه درمل او کافي وسایل لرو او په دې کمپاین کې به وکارول شي.»
سمنګانو کې کروندګر د دې ملخانو د پراخ یرغل د پیل په تړاو اندېښنه څرګندوي او وايي، که په وخت ورته جدي پاملرنه و نه شي، نو د دوی فصلونه او څړځایونه به په بشپړه توګه له منځه یوسي.
کروندګر الله مراد وايي: « زموږ په سیمه کې ډېر زیات ملخان راوتلي او که یې مخه ونه نیول شي، تر راتلونکې یوې میاشتې به ټول فصلونه وخوري. که څه هم حکومت درمل او کسان رالېږي، خو خلک هم باید همکاري وکړي، ترڅو دغه آفت مهار شي.»
کروندګر عبدالرحیم وايي: « موږ له مسوولینو غوښتنه کوو چې دا ملخان په لومړي سر کې له منځه یوسي؛ کله چې دوی له هګیو راووځي او وزر وکړي، بیا یې وژل او له منځه وړل سختېږي.»
تر اوسه څرګنده نه ده چې ملخانو په یاد ولایت کې کرنیزو ځمکو او ولاړو فصلونو او څرځایونو ته څومره زیان اړولی، خو بزګران وايي چې د ملخانو شمېر ورځ تر بلې زیاتېږي.
د دې ولایت بزګران خبردارې ورکوي چې که د ملخانو د برید مخنیوي لپاره کوټلي ګامونه پورته نه شي، ممکن په یاد ولایت کې فصلونو ته خورا زیات زیان ورسېږي او یا هم په بشپړه توګه له منځه لاړ شي.
