په داسې حال کې چې پاکستان په خپله خاوره او خيبرپښتونخوا کې لا هم له مېشتو افغانانو سره ناسم چلن او زور زیاتی روان ساتلی، پر وړاندې يې د افغانانو اعتراضونه هم تاوده شوي.
د افغان کډوالو يوې شورا دغه چلن غير انساني بللی او زياته کړې يې ده چې دې وضعيت په خيبرپښتونخوا او پاکستان کې د مېشتو افغانانو ژوند له سختو کړاوونو سره مخ کړی.
په جلاوطنۍ کې د افغانانو عالي شورا ویلي: «که دا نن د پناه غوښتونکو د حقونو مدافع بنسټونه د دې انساني فاجعې پر وړاندې چوپ پاتې شي، نو د بشري حقونو او انسانيت دفاع لپاره هېڅ مشروعيت نه پاتې کېږي.»
بله خوا، د کډوالو حقونو مدافعان په خيبرپښتونخوا او پاکستان کې له افغان کډوالو سره روان ناسم چلن او له زور زیاتي ډک وضعیت اندېښمن کړي او پر وړاندې يې د نړيوالو چوپتيا د پاکستان له عمل سره همکاري يادوي.
د کډوالو حقونو مدافع عبدالرزاق عدیل وايي: « د ملګرو ملتونو چوپتیا تر ډېره له اجرایي کمزورتیا، حقوقي محدودیتونو او سیاسي ملاحظاتو سرچینه اخله نه له بشپړې بې پروايۍ. له بده مرغه ملګري ملتونه اوسمهال له انسداد سره مخ دي؛ دوی له یوې خوا پوهېږي چې د افغانستان په څېر یوه ځای ته د کډوالو جبري ستنول چې له لوږې او بې سرپناهۍ سره مخامخ کېږي، د انساني اصولو خلاف عمل دی، خو له بلې خوا له دې عمل څخه د پاکستان منع کولو لپاره هېڅ ډول نظامي یا اقتصادي وسیله نه لري.»
د کډوالو حقونو مدافع نظرمحمد نظري وايي: « د کډوالو عالي کمېشنرۍ او د کډوالو عالي شورا په څېر نړیوال بنسټونه باید بېړنۍ او انساني مرستې چمتو کړي او ترڅنګ یې باید نړیواله ټولنه د ډېپلوماټیک فشار له لارې پاکستان د کډوالو حقونو رعایتونو ته مجبور کړي.»
پاکستان او پښتونخوا مېشت افغانان هم شکايت کوي چې ورځ تر بلې پرې د ژوند کړۍ را تنګېږي او ان په دې وروستيو کې د ژوند لومړنيو خدمتونو ته هم لاسرسی نه لري.
پاکستان مېشت افغان مجاهد شينواری وايي: « د پاکستان پولیس او د افغان کډوالو کارځایونو ته ورځي او مهرلاک کوي یې. همدارنګه په لارو، کوڅو او بازارونو کې هم د افغان کډوالو د نیولو لړۍ ادامه لري. دلته پراته افغانان له لویې پرېښانۍ سره مخ دي.»
پاکستان په داسې حال کې له افغان کډوالو سره چلن لا سخت کړی چې پر افغانستان د تېري له امله يې له کابل سره اړيکي په خورا ترينګلي وضعيت کې دي.
