د ۲۰۳ منصوري قول اردو له رونیز مرکزه ۵۸۰ سرتیري له دوو میاشتنیو زده کړو فارغ شول 

په پکتیا ولایت کې د ۲۰۳ منصوري قول اردو له روزنیز مرکزه  د جمعې پر ورځ د « ۱۴۰۱ کال د غويي پر ۲ مه»  د ۵۸۰ سرتېرو فراغت مراسم ترسره شول. 

د یادې قول اردو قوماندان خالد ایوب د سرتېرو فراغت په اړه جوړو شویو مراسمو کې د وینا پر مهال وویل،دغو سرتیرو اړینې نظامي زده کړې تر لاسه کړي،چې پکتیا، پکتیکا او خوست ته څیرمه به پر ډیورنډ فرضي کرښه ځای پر ځای شي. 

ایوب وايي،له روژې وروسته  د ډیورنډ فرضي  کرښې هغو سیمو کې هم پوستې جوړوي،چې تر اوسه پورې په کې اسلامي امارت نظامي حضور نه لري. 

هغه زیاته کړه:« سرحدونو لپاره خو اوس تاسو ولیدل، چې دلته د سپکو او درنو وسلو تمرینات وشول. دا سرتیري خو سرحدونو ته لیږو،سرحدي سیمو کې د پوستو پر جوړولو کار روان دی او هغو سیمو کې به له روژي وروسته پیل شي،چې لا پوستې په کې نه لرو.» 

اخوا فارغ شوي سرتیري بیا وايي،دوه میاشتو کې یې اړینې نظامي زده کړې تر لاسه کړي او د هېواد په هره برخه کې دندو ته چمتو دي. 

د اسلامي اردو یو تن فارغ شوی سرتیری وايي:« اردو ته د خدمت لپاره راغلو،تر څو د مسلمانانو له عزت او ناموس او له اسلامي سرحداتو ساتنه وکړو.» 

د اسلامي اردو یو  بل فارغ شوی سرتیری بیا وايي:«موږ خلکو ته ډاډ ورکوو،چې د خلکو د عزت ساتنې لپاره راپورته شوي یو،تر اخري سلګۍ به د خلکو او اسلامي نظام ساتنه کوو.»

د پکتیا یو شمیر اوسیدونکي د سرتیرو پر مسلکي روزنه ټینګار کوي او وايي، پر ډیورنډ فرضي کرښه او له ګاونډیو هېوادونو سره دې ټولو پولو کې ځای پر ځای شي. 

د پکتیا یو تن اوسېدونکی وايي:« سرتیري باید ټولو سرحدونو کې ځای پر ځای شي، له استادانو مو غوښتنه دا ده،چې ښې او ګټورې نظامي زده کړې ورکړي.»

د پکتیا یو تن اوسېدونکی وايي:« راتلونکي کې دې نور سرتیري هم وروزل شي،تر څو هېواد کې امنیت ټینګ شي او له خلکو په ښه شان ساتنه وکړي.» 

په ټولییز ډول له روزنیزو مرکزونو سرتیري یوه یا دوه میاشتې زده کړې تر لاسه کوي، چې بسنه نه کوي خو د اسلامي امارت نظامي مسوولین وایي،په راتلونکي کې د دغو سرتیرو لپاره ګڼ روزنیز پروګرامونه په پام کې لري.