د لومړي ځل لپاره د هرات له پاشدان بند څخه د کروندګرو کرنیزو ځمکو خړوبولو په موخه اوبه خوشي شوې.
مسوولین وایي، هرات ولایت کې د وروستیو ورښتونو له زیاتوالي سره په پاشدان بند کې د اوبو کچه لوړه شوې چې له امله یې کروندو ته د اوبو خوشي کېدو زمینه هم برابره شوې ده.
د دوی په خبره، د پاشدان بند اوبه په عادلانه ډول د ۸۰ کیلومټره کانالونو او ویالو له لارې لومړي پړاو کې د کروخ ولسوالۍ کلیو ته بهیږي او وروسته به د انجیل، پښتون زرغون ولسوالیو او همدارنګه د هرات ښار د شمالي برخو ویالو ته هم ورسېږي.
د پاشدان بند پروژې مرستیال عبدال اله قاضيزاده وايي: « دغه بند اوس د ګټه اخستنې واقعي پړاو ته رسېدلی او خلک ترې ګټه اخلي. ښه والی یې دا دی چې د اوبو له خوشي کېدو سره به له ۵۰ زرو ډېر کسان په کارونو بوخت شي، زیاتې ځمکې به وکرل شي، کرنیز محصولات به زیات شي او زموږ د خوراکي ځان بسیاینې کچې به ورسره لوړه شي.»
بله خوا، د هرات یو شمېر کروندګر وایي، په تېرو کلونو کې د اوبو کمښت له امله له جدي ستونزو سره مخ وو او ان ځینې ځمکې یې شاړې پاتې شوې وې، خو سږ کال د وروستیو ورښتونو او د پاشدان بند اوبو په خوشي کېدو سره به یې حاصلات څو برابره زیات شي.
د کروخ ولسوالۍ د پاشدان کلي اوسېدونکی عبدالغني وايي: « زموږ ځمکې ډېر حاصلخېزې دي او همدارنګه ښه باغونه او ونې لرو. موږ کولی شو د غنمو، وربشو او جوارو په ګډون هرڅه وکرو. له دې وروسته به هر هغه څه وکرو چې خلک ورته اړتیا لري.»
کروندګر احمدشاه وايي:« همدا اوس هرات کې د غنمو، وربشو او ځینو نورو حبوباتو د کرلو وخت دی. د پاشدان بند اوبه کولی شي د دغو نباتاتو په رسولو کې د کروندګرو مرسته وکړي.»
کروندګر محمد عثمان وايي: « زموږ خلک دلته خزاني کښتونه لري، لکه غنم، وربشې، زعفران، باغونه او ونې. اوس چې په بند کې اوبه شته، نیت لرو چې پسرلني کښتونه هم وکرو، په دې کې پالېزونه، رومیان او سبزیجات شامل دي.»
په ورته مهال، د هرات سیمهییزې ادارې مسوولین ټینګار کوي چې د دې بند اوبه به د کروندګرو د کرنیزو ځمکو خړوبولو اړتیاوې پوره کېدو پوري خوشي وي.
د هرات والي ویاند محمد یوسف سعیدي وايي: « د پاشدان بند اوبه د لومړي ځل لپاره د کروندو د اوبه کولو او زراعت لپاره خوشي شوې. د هرات محلي اداره ژمنه ده چې د ولایت ټولو کروندګرو ته اړین خدمات چمتو کړي. همدارنګه، موږ هڅه کوو چې خوشي کړې اوبه په عادلانه توګه تر ټولو کروندګرو او کروندو ورسوو.»
د پاشدان بند د هرات ښار شمال ختیځ خوا ته ۲۵ کیلومټرۍ کې په کروخ ولسوالي کې موقعیت لري چې د ۵۴ میلیون متر مکعب اوبو زېرمه کولو او د ۱۳ زره هکټاره کرنیزو ځمکو خړوبولو ظرفیت لري.
