د پاکستان پوځي رژیم له لوري د بريدونو په دوام، يوازې په ختيځو ولايتونو کې له خپلو مېنو زرګونه کورنۍ بې ځايه شوې دي.
د اسلامي مرستو سازمان يا «اسلاميک ريليف» ويلي، پر افغانستان د پاکستان بريدونو له امله زرګونه بې ځايه شوې کورنۍ د سرپناه نه لرلو له امله په ناوړه وضعيت کې دي.
په افغانستان کې د اسلاميک ريليف رییس محمد ذوالقرنین عباس ویلي: « زرګونه کورنۍ له خپلو کورونو بې برخې شوي او په بېړني ډول سرپناه او خوړو ته اړتیا لري. د لویانو او کوچنيانو په شمول ټولې کورنۍ تر شنه اسمان لاندې شپې او ورځې تېروي. موږ خپلې مرستي پراخوو چې خېمې، کمپلې او نغدې پیسې په کې شامل دي، ترڅو بې ځایه شوي خلک وکولی شي د ځان لپاره ورځنۍ اړتیاوي پوره کړي.»
دې سازمان د دواړو هېوادونو ترمنځ د اوربند د دوام غوښتنه هم کړې.
بله خوا، د پاکستان د بریدونو له امله بېځایه شوې کورنۍ پر مرستې سربېره له مرستندویانو غواړي چې پر پاکستان فشار راوړي چې پر ملکيانو بريدونه ودروي.
بېځایه شوی صالح مرجان وايي: « تاسو ولیدل چې د پاکستان پوځي رژیم کوچني ماشومان په ګولیو ویشتي دي. دا یوازې ماشومان نه دي بلکې هلته مېشت ټول خلک په تکلیف دي او له خپلو کورونو بېځایه شوي.»
بېځایه شوی وسیم الله وايي: « موږ به خپل کور او کلي پسې ډېر خفه شوي یو. دلته له کلي لرې هېڅ ځای نه لرو.»
د بشري حقونو مدافعان هم د پاکستان له لوري د ملکي وګړو هدف ګرځول بشري جنايت بولي او زياتوي، اوس مهال د دې هېواد بريدونو له امله بې ځايه شوې کورنۍ په سخت حالت کې دي.
د بشري حقونو فعال روکای وليزاده وايي: « له بده مرغه د پاکستان پوځي رژیم له اوږدې مودې راهیسې له کډوالو څخه د خپلو ناوړه موخو ترلاسه کولو لپاره د فشار د یوې وسیلې په توګه کار اخلي. موږ د کډوالو او بشري حقونو له ښکېلو سازمانونو تمه لرو چې د پاکستان د بریدونو مخه ونیسي، ترڅو هم د پاکستان په داخل او هم د ډیورنډ فرضي کرښې په اوږدو کې له فاجعې مخه ونیول شي.»
د ملګرو ملتونو له لوري خپرې شوې شمېرې ښيي چې پر افغانستان د پاکستان بريدونو له امله ۱۱۵ زره افغانان ډيورنډ فرضي کرښې ته څېرمه سيمو بې ځايه شوي دي.
د دې بريدونو په نتيجه کې ملکيان او د هغوی تاسيسات په نښه او تر ټولو خونړی بريد يې په کابل کې پر نشهيي توکو د روږدو کسانو د درملنې پر مرکز هوايي بريد و.
د رسمي شمېر له مخې په دې بريد کې ۴۰۰ ملکي افغانان شهيدان او نږدې ۳۰۰ نور ټپيان شول.
