د پاکستان پوځي الوتکو دوه ورځې وړاندې خوست او کونړ ولایتونو کې هوايي برېدونه وکړل،چې له امله یې لسګونه ولسي خلکو ته مرګ ژوبله واوښته.
له تېرو شلو کلونو راکیټي بریدونو وروسته دا لومړی ځل دی،چې پاکستان پر افغان خاوره هوایي برېدونه کوي.
د سیاسي چارو شنونکي وايي، د پاکستان د دې کار ځواب باید ورکړل شي او دې لپاره ولس او پخواني جنرالان له هېواده دفاع لپاره چمتو دي.
په ورته وخت کې دوی وايي، د پاکستان د یرغل پر وړاندې چوپتیا ملي خیانت ده.
د سیاسي چارو شنونکی یحی چاووش وايي:« د هر نوعه یرغل پر وړاندې چوپتیا ملي خیانت ده، بیا اعلانوم،چې طالبان نه باید د پاکستان د تجاوز په اړه غلي پاتې شي، زیات جنرالان او ولس شته دی،چې د پاکستان مقابل کې ودریږي.»
د پاکستان له لوري هرځل د افغانستان خاوره ګواښل شوې، خو کابل یوازې د دې ستونزې د حل لپاره د خبرو لار نیولې ده،چې په تېرو شلو کلونو کې یې هېڅ ډول پایله نه درلوده.
اسلام اباد کې خبریال طاهرخان وایي،د پاکستان له لوري د طاقت استعمال پرځای اقدام نه وه او ښه وه،چې دا مسله د خبرو له لارې حل شي.
هغه زیاته کړه:« ډېری خلک د طاقت د استعمال سره موافق نه دي،ځکه د طاقت استعمال خو مسلې نورې هم خرابوي،د مسلو د حل لپاره خو پاکستان او افغانستان ترمنځ د مذاکراتو یو نظام موجود دی،چې هغه کې پوځ هم شته،ګروپونه هم شته او استخبارات هم شته. په دې نظام تېرو حکومتونو هم مسلې حل کولې،نواوس د طاقت استعمال ته څه اړتیا ده.»
د افغانستان اسلامي امارت هم پر خوست او کونړ ولایتونو د پاکستان پوځي الوتکو هوايي برېدونو له امله د خلکو تر سخت فشار لاندې دي.
اسلامي امارت د اوس لپاره یوازې دا برید غندلی دی،خو د پاکستان په اړه یې کوم ګام نه دی پورته کړی.
د اسلامي امارت ویاند مرستیال انعام الله سمنګانی وايي:« اسلامي امارت د پاکستان بریدونه،چې په خوست او کونړ ولایتونو کې یې کړي،په کلکه غندي او دا وضح کوي،چې د افغانستان په خاوره تجاوز د منلو وړ نه ده او د مسلې حل لپاره په ډیپلوماټیکو لارو کار روان دی.»
خو د خلکو تمه او غوښتنه له اسلامي اماته دا ده،چې د پاکستان د بریدونو په اړه غلي پاتې نه شي.پاکستان له افغانستان سره تر اوسه پورې په ژمنو عمل نه دی کړی او هرکله یې افغان لوری په بې پایلو خبرو مصروف کړی دی.
اوس به ولیدل شي،چې اسلامي امارت د پاکستان د یرغل په اړه څه ګام پورته کوي.
