کابلوف زیاته کړې، روسي لوری په دې تړاو خبرو کې د کډوالۍ د نافذه قوانینو او اقتصادي ملاحظاتو له مخې عمل کوي.
کابلوف څرګنده کړې:« تر اوسه کومې مشخصې هوکړې ته نه یوو رسېدلي، خو د دې موضوع په اړه تماسونه روان دي،چې د روسیې لوری د نافذه کډوالۍ قوانینو او اقتصادي اړتیاوو له مخې عمل کوي.»
د نړیوالو چارو شنونکي روسيې ته د کار بشري ځواک لېږلو په اړه د اسلامي امارت د هڅو هر کلی کوي او وايي، په دې کار سره به ډېر شمېر ځوانان پر کار بوخت او د بې روزګارۍ کچه به ټيټه شي.
دوی بهر ته د افغان کارګرو لېږل نه يوازې د خلکو، بلکې د حکومت پر ګټه هم بولي او په خبره یې، له دې سره به اسلامي امارت وکړی شي له نورو هېوادونو سره خپل مناسبات قوي کړي.
د نړیوالو اړیکو شنونکی سمیر انګار وايي:« دا د اسلامي امارت لپاره یو مهم ډېپلوماټيک پرمختګ دی، د سیمې توازن بدلوي، د اسلامي امارت لپاره نوې سیاسي او اقتصادي دروازې پرانېزي او په افغانستان کې د ثبات ټینګېدو لامل کېږي.»
له دې وړاندې بهر ته د افغان کارګرو د لېږلو په اړه له قطر، ایران، سعودي عربستان، عمان او متحده عربي اماراتو سره هم هوکړې شوي دي.
د کار او ټولنیزو چارو وزارت ویاند سمیع الله ابراهیمي هم تایيدوي چې له روسيې سره په دې اړه خبرې دوام لري او تمه شته، چې په دې اړه هوکړې ته له رسېدو وروسته به ځوان، مسلکي او متخصص کاري ځواک ياد هېواد ته ولېږل شي.
ابراهیمي په دې اړه وايي:« هڅه دا ده چې یادو هېوادونو کې افغان کارګرو ستونزو ته رسېدنه وشي او همدارنګه په راتلونکې کې افغان کارګرو ته په یادو هېوادونو کې په قانوني توګه د کار زمینه هم برابره شي. یو له هغو د روسیې هېواد هم دی. په دې برخه کې د هېوادوالو له حوصلې مننه کوو او ترڅنګ یې له دوی هیله لرو چې یادو هېوادونو ته د کاري وېزرو په نوم باندې هېڅ ادرس، شرکت او شخص ته پیسې او خپل اسناد ورنه کړي، ترهغې چې رسمي تفاهم نه وي ترلاسه شوی او د کار او ټولنیزو چارو وزارت له ادرسونو له تاسو سره نه وي شریک شوی، هیله ده چې د هېڅ ډول دروغو، جعل ښکار نه شئ.»
له دې وړاندې په روسيې کې د افغانستان سفير هم مسکو ټايمز ورځپاڼې ته ويلي و چې هېواد يې روسيې ته د ماهر بشري ځواک لېږلو لپاره چمتوو دی، څو هلته د کار بازار اړتياوې پوره کړي.
د کار او ټولنیزو چارو وزارت د مالوماتو له مخې، په راتلونکو پنځو کلونو کې به په بېلابېلو برخو کې ۱.۵ ميليونو کسانو ته په کوردننه او بهر د کار کولو زمینه برابره شي.
