د افغانستان اسلامي امارت د بهرنیو چار وزارت په خوست او کونړ ولایتونو کې د پاکستاني الوتکو بمبارۍ په غبرګون کې د شنبې پر ورځ د «۱۴۰۱ کال د وري پر ۲۷» په کابل کې د دغه هېواد سفیر منصور احمد خان احضار کړ او اعتراضیه لیک یې ورکړ،چې خپلو مشرانو ته یې ورسوي.
بهرنیو چارو وزارت وايي:« افغان لوري، د پاکستاني ځواکونو له لورې تازه په خوست او کونړ ولایتونو کې ترسره شوي بریدونه وغندل او په ټینګار سره یې د بیا تکرار مخنیوي غوښتنه وکړه.»
د بهرنیو چارو وزیر سرپرست امیرخان متقي، د پاکستان سفیر ته ویلي دا ډول بریدونه به د دواړو هېوادونو ترمنځ اړیکې ترینګلي کړي او له دغه حالته به بدخواهان او مغرضې کړئ ګټه واخلي.
اخوا یو شمیر مخکینیو لوړ پوړو چارواکو هم په خوست او کونړ کې د پاکستاني الوتکو بریدونو ته غبرګون ښودلی.
د بهرنیو چارو مخکینی وزیر محمد حنیف اتمر وايي:« په خوست او کونړ کې د اوسېدو پر ځایونو د پاکستان د پوځ د تیرې شپې بریدونه، چې زموږ د بې ګناه ملکیانو د تلفاتو لامل شوی، په هېڅ وجه د توجې وړ نه دي او په کلکو ټکو یې غندم.»
په پښتونخوا کې هم دغه بریدونه غندل شوي او د ملي جمهوري غورځنګ مشر، محسن داوړ د پاکستان په پارلمان کې پر افغان خاوره د پاکستاني پوځ تیری غندلی.
داوړ زیاته کړې:« تيره شپه د پوځ او پاکستان الوتکو په شمالي وزيرستان کې د پولې هغې غاړې ته د بې ځايه شویو،خلکو په يو کيمپ بمبار کړی دی،چې په پایله کې یې تر ۴۰ زیات کسان شهیدان شوي.دا پیښه په کلکو ټکو غندم. دا زموږ سرې کرښې دي، داسې څه شته،چې موږ پرې هېڅکله همغږي نه شو او غلي پاتې نه شو، دا پېښه باید په جدي توګه وڅېړل شي.»
په ټولنیزو رسنیو کې، په افغان خاوره د پاکستانیو الوتکو بریدونه یرغل یاد شوی او له حکومته د جدي او بی المثل اقدام غوښتنه شوې ده.
پاکستانیو، جیټ الوتکو د افغانستان په خوست او کونړ ولایتونو وړمه شپه هوایي بریدونه کړي او د ښځو او ماشومانو په ګډون یې له پنځوسو زیات ملکیان وژلي او لسګونه نور یې ټپيان کړي دي.
