په لندن کې د پښتون ژغورنې غورځنګ(پيټياېم) غړیو د پاکستان تر کنټرول لاندې سیمو کې د پښتنو پر وړاندې د پاکستان پوځي رژیم د ظلمونو مخنیوي لپاره په لندن کې د ملګرو ملتونو د دفتر پر وړاندې احتجاج وکړ.
احتجاج کوونکو د ملګرو ملتونو دفتر مخې ته د یاد غورځنګ د مشر غږیز پیغام هم خپور کړ چې په کې د پاکستان پوځي رژیم له لوري په خیبر پښتونخوا او نورو سیمو کې د پښتنو پر ضد د روانو ظلمونو یادونه شوې.
منظور احمد پښتین په دې غږیز پیغام کې له ملګرو ملتونو غوښتي چې پر اسلام اباد فشار راوړي، تر څو د پښتنو ځورولو، نیولو او وژنو روانه لړۍ پای ته ورسوي.
پښتین زیاته کړې: « په خیبرپښتونخوا، باجوړ، لکي مروت، شمالي وزیرستان او په ګڼو نورو سیمو کې د پښتونو وضعیت ښه نه دی. د پاکستاني پوځ له خوا یوازې په ۲۰۲۵ میلادي کال کې ۳۲۹ ولسي وګړي د ډیورند فرضي کرښې په اوږدو کې وژل شوي دي.»
نوموړي په دې غږیز پیغام کې دغه راز ویلي، د پاکستان پوځي رژیم د پښتنو هغه مشران چې د دوی له سیاستونو او تګلارو سره مخالف دي، وژني او یا یې زندان ته اچوي.
منظور احمد پښتین په خپل پیغام کې له ملګرو ملتو د پاکستان پوځي رژیم له لوري په افغانستان کې د عامو خلکو د هدف ګرځولو مسئله هم یاده کړې او د مخنیوي لپاره یې له دې سازمانه د همکارۍ غوښتنه کړې.
د پيټيایم مشر پر ملګرو ملتونو هم له دې امله نیوکه کړې چې تراوسه یې ۱۵ځلې ملګرو ملتونو سره دا مسئله شریکه کړې، خو د دې سازمان له خوا کوم ګام نه دی پورته شوی.
له دې یوه ورځ مخکې د یاد غورځنګ غړیو د بریټانیا لومړي وزیر د دفتر مخې ته هم راټول شول او هغه ته یې یو لیک وسپاره چې په کې د پښتنو پر وړاندې د پاکستان پوځي رژیم کړنو ته اشاره شوې. په لیک کې د بریټانیا له حکومت غوښتل شوي چې د پاکستان پر پوځي رژیم فشار راوړي او د پښتنو پر ضد د کېدونکو ظلمونو د مخنیوي غوښتنه وکړي.
پښتین په پاکستان کې د هغو ګوندنو ننکه هم کړې چې د خپلو سیمو او خلکو لپاره سوله او عدالت غواړي.
د پښتون ژغورنې غورځنک مشر په دې تړاو ویلي: « یوازې د پيټياېم غړي نه دي نادرکه شوي بلکې زموږ د معلوماتو له مخې، د پاکستاني پوځ له خوا تر ۵زرو زیات کسان نادرکه شوي دي. همدارنکه ماهرنک بلوڅ چې د سولې، عدالت او بلوڅانو د حقونو لپاره مبارزه کوي. پاکستان د ښو روابطو جوړولو پر ځای نظامي پالیسي پر مخ وړي.»
د پښتون ژغورنې غورځنګ مشر او غړي په خیبر پښتونخواکې او نورو پښتون مېشتو سیمو کې د پاکستان پوځي رژیم د روانو ظلمونو پر وړاندې د پښتنو د ویښولو ترڅنګ، په نړیواله کچه هم خپل غږ پورته کوي.
دوی له نړیوالې ټولنې، ملګرملتونو او نړیوالو سازمانونو غوښتي چې غږ یې واوري او خيبرپښتنونخوا کې د پښتنو پر وړاندې روان تاوتریخوالي مخه ونیسي.
د پښتون ژغورنې غورځنک د مرکزي کمیټې غړی خیرالله امین وايي: « دلته په ټولو ساحو کې له پښتنو سره ډېر ظلم کېږي. لږترلږه هغه تنظیمونه او ټولنې چې د بشري حقونو لپاره کار کوي، باید دلته راشي او وویني چې د پاکستان پوځ څه روان کړي او د خلکو بنیادي حقوق یې تلف کړي.»
تر دې وړاندې هم د پښتون ژغورنې غورځنک غړیو د جرمني په فرانګفورټ ښار کې لاریون ترسره کړ چې د پاکستان پوځي رژیم په ضد یې شعارونه ورکول او له اورپایي هېوادونو یې وغوښتل چې د پاکستان په پښتون مېشتو سیمو او افغانستان کې د ملکي وګړو نښه کول دې ودروي.
